ނ.މިލަދޫގައި މަސައްކަތް ކުރާ ފުލުހެއްގެ ސައިކަލްގައި މިދިޔަ ފެބްރުއަރީ މަހު އަލިފާން ރޯކޮށްލި މައްސަލައިގައި އެރަށު މީހެއްގެ މައްޗަށް ދައުވާ އުފުލައިފިއެވެ.
މި މައްސަލައިގައި ދައުލަތުން ދައުވާ އުފުލާފައިވަނީ ނ. މިލަދޫ، ފަތަގުމާގެ، ޢަބްދުﷲ ޝުހާދު އަޙްމަދުގެ މައްޗަށެވެ.
ޕީޖީ އޮފީހުން ވިދާޅުވީ 18 ފެބުރުވަރީ 2022 ވަނަ ދުވަހުގެ ދަންވަރުގެ ވަގުތެއްގައި ނ. މިލަދޫ، މާގަސްދޮށުގެ ގޯތި ތެރޭގައި ބަހައްޓާފައި ހުރި ނ.މިލަދޫ ޕޮލިސް ޑެސްކުގައި މަސައްކަތްކުރާ ފުލުހެއްގެ ސައިކަލުގައި އަލިފާން ރޯކޮށްލި މައްސަލައިގައި ޢަބްދުﷲ ޝުހާދު އަޙްމަދުގެ މައްޗަށް ދައުވާ ކުރަނީ ދިވެހިރާއްޖޭގެ ޤާނޫނުލްއުޤޫބާތުގެ 220 ވަނަ މާއްދާގެ (ހ) ގެ 1 ވަނަ ނަންބަރާ ހަވާލާދީ އެމާއްދާގެ (ރ) ގެ 2 ވަނަ ނަންބަރުގެ ދަށުންނެވެ.
މި މައްސަލައިގައި ޢަބްދުﷲ ޝުހާދު އަޙްމަދުގެ މައްޗަށް އުުފުލާފައި ވަނީ މުދަލަށް ގެއްލުން ދިނުމުގެ ކުށުގެ ދަޢުވާއެވެ. އެ ދައުވާ އުފުލާފައި ވަނީ ނ. މިލަދޫ މެޖިސްޓްރޭޓް ކޯޓްގައެވެ.
މި މައްސަލައާ ގުޅިގެން އިތުރު ބަޔަކު ހައްޔަރުކުރި ނަމަވެސް، އެމީހުންގެ މައްޗަށް ދައުވާކުރާ މިންވަރަށް ހެކި ލިބިފައި ނުވާތީ އެމީހުންގެ މައްޗަށް ދައުވާ އުފުލާފައެއް ނުވެއެވެ.
