މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހިންގަމުންދާ ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ އާ ރަންވޭ މިއަދު ބޭނުންކުރަން ފަށައިފި އެވެ.
ވީއައިއޭގައި ހެނދުނު ބޭއްވި އެ ރަސްމިއްޔާތު ޝަރަފުވެރި ކޮށްދެއްވީ ނައިބު ރައީސް ފައިސަލް ނަސީމެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ތަރައްގީކުރި އާ ރަންވޭ އެޅުމުގެ މަސައްކަތް ކޮށްފައިވަނީ ޗައިނާގެ ބީޔޫސީޖީ ކުންފުނިންނެވެ. ރަންވޭ އެޅުމުގެ މަސައްކަތް 2017 ވަނަ އަހަރު ފެށިއިރު، 2018 ވަނަ އަހަރުގެ ސެޕްޓެމްބަރުމަހުގެ 18 ވަނަ ދުވަހު ރަސްމީކޮށް ހުޅުވައި ވަނީ ޓެސްޓް ފްލައިޓް ޖައްސާފައެވެ. ނަމަވެސް މިހާތަނަށް އެ ތަން ބޭނުމެއް ނުކުރެ އެވެ.
އާ ރަންވޭ ތަރައްގީކުރުމުގެ މަޝްރޫއަށް ސަރުކާރުން ޗައިނާގެ އެގްޒިމް ބޭންކުން ނެގި ގާތްގަނޑަކަށް 373 މިލިއަން ޑޮލަރު ނުވަތަ 5.7 ބިލިއަން ރުފިޔާ ޚަރަދުވެފައިވާއިރު، މި ރަންވޭ ތަރައްގީކޮށްފައިވަނީ އެއާބަސް މަރުކާގެ އެންމެ ބޮޑެތި A380 ބޯޓަށްވެސް ޖެއްސޭ ފެންވަރަށެވެ. އާ ރަންވޭ ހަދައިދިނީ ޗައިނާގެ ބެއިޖިން އާބަން ކޮންސްޓްރަކްޝަން ގުރޫޕް (ބީޔޫސީޖީ) ކުންފުނިންނެވެ.އާ ރަންވޭގެ ދިގުމިނުގައި 3،400 މީޓަރު ހުންނައިރު، ފުޅާ މިނުގައި 60 މީޓަރު ހުރެއެވެ.
އާ ރަންވޭ ރަސްމީކޮށް ބޭނުންކުރަން ފެށުމުގެ ގޮތުން ބޭއްވި ރަސްމިއްޔާތަށްފަހު އާ ރަންވޭއަށް ޖެއްސި ފުރަތަމަ ބޯޓަކީ ބޮއިން 777 މަރުކާގެ އެމިރޭޓްސްގެ ފުލައިޓެވެ.
އާ ރަންވޭ ބޭނުންކުރަން ފެށުމުން، މިހާތަނަށް ބޭނުންކުރަމުން އައި ރަންވޭ ދެން ބޭނުންކުރާނީ ޓެކްސީވޭ އަކަށެވެ.
ކުރީގެ ރަންވޭ އެންމެ ފުރަތަމަ އަޅާފައިވަނީ 1966 ވަނަ އަހަރު ރައީސް އިބްރާހީމް ނާސިރުގެ ވެރިކަމުގައެވެ. ދިވެހީންގެ މަސައްކަތުން އޭރު ރަންވޭ ހަދާފައިވަނީ ދަގަނޑުފިލާ ބޭނުންކޮށްގެންނެވެ.
