ޤަވާއިދާ ޚިލާފަށް ރަޖިސްޓްރީ ކޮށްފައިވާ ވެހިކަލްތައް ދަނީ ފެންނަމުން ކަމަށާއި ރަޖިސްޓަރީ ބާތިލް ކުރުމުގެ މަސައްކަތް ފަސް ޖެހުމެއްނެތި ކުރައްވާނެ ކަމަށް ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވެއްޖެ އެވެ.
މިނިސްޓަރު ނަހުލާ ކުރެއްވި ޓްވީޓެއްގައި ވިދާޅުވީ ޓްރާންސްޕޯޓް މިނިސްޓްރީގެ މަސައްކަތްތައް ހަރުދަނާ ކުރުމަށް ކުރަމުންދާ މަސައްކަތްތަކުގެ ތެރެއިންނާއި ހަދަމުންދާ އޯޑިޓް ތެރެއިން އޮޅުވާލައިގެން ރަޖިސްޓަކޮށްފައިވާ އުޅަނދުތައް ފެންނަމުންދާ ކަމަށެވެ. އެހެންކަމުން އެފަދަ ކަމެއް ފެނިއްޖެނަމަ އެފަރާތްތަކާއި މެދު ފިޔަވަޅު އަޅުއްވާނެ ކަމަށް ވިދާޅުވި އެވެ.
ގަވާއިދާ ހިލާފަށް ރަޖިސްޓާ ކޮށްފައިވާ އުޅަނދުތަކުގެ ރަޖިސްޓްރީ ބާތިލް ކުރާނެ ކަމަށާއި އުޅަނދު ރަޖިސްޓާ ކުރުމުގައި ގަވާއިދުގެ ތެރެއިން ކުރުމަށް މިނިސްޓަރު ވަނީ އިލްތިމާސް ކުރައްވައިފަ އެވެ.
ޒީރޯ ޓޮލަރެންސް ޓު ކޮރަޕްޝަނަކީ، ރައީސް އިބްރާހިމް މުހައްމަދު ސޯލިހުގެ ވައުދުފުޅެއް ކަމަށާއި ކޮރަޕްޝަން ހުއްޓުވުމަށް އަޅަންޖެހޭ ކޮންމެ ފިޔަވަޅެއް ވަކި މީހަކަށް ބެލުމެއްނެތި އަޅާނެ ކަމުގެ ޔަގީންކަން އަރުއްވާ ކަމަށް އެކަމަނާގެ ޓްވީޓުގައި ވިދާޅުވިއެވެ.
"އަދި، މިކަންތައްތައް ހަމަ މަގަށް އެޅުވުމުގައި އެއްވެސް ފަސް ޖެހުމެއްނެތި މަސައްކަތް ކުރާނެ ކަމުގެ ޔަގީންކަން އަރުވަން." މިނިސްޓަރު ނަހުލާ ވިދާޅުވިއެވެ.
މި މަހުގެ މިހާތަނަށް ޓްރާންޕޯޓް މިނިސްޓްރީއިން ވަނީ ގަވައިދާ ހިލާފަތް ރަޖިސްޓްރީ ކޮށްފައިވާ 148 ވެހިކަލެއްގެ ރަޖިސްޓްރީ ބާތިލްކޮށްފަ އެވެ.
