ހުޅުމާލޭ ހޮސްޕިޓަލްގައި ގާއިމުކުރާ މެންޓަލް ހެލްތު ސެންޓަރު އަންނަ ހަފުތާގައި ހުޅުވާނެ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެ އެވެ.
މިއަދު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި މިއުވާން ވިދާޅުވީ ނަފުސާނީ ބަލިތަކަކީ މީގެ ކުރިން އަޅާނުލެވި އޮތް ކަމެއް ކަމަށާއި ނަމަވެސް މި ސަރުކާރުން ވަރަށް ބޮޑު އިސްކަމެއްދޭ ކަމެއް ކަމަށެވެ.
އެގޮތުން މާލެ އާއި ރަށްރަށުގައިވެސް ސިއްހީ ފަރުވާގެ ތެރޭގައި މުހިންމު އިސްކަމެއް ދީގެން، މެންޓަލް ހެލްތު ދާއިރާ ތަރައްގީ ކުރަމުން އަންނަ ކަމަށް ވިދާޅުވި އެވެ. އެގޮތުން އައިޖީއެމްއެޗްގައި ގާއިމުކޮށްފައިވާ މެންޓަލް ހެލްތު ސެންޓަރުގެ އިތުރުން އަތޮޅުތަކުގައިވެސް މެންޓަލް ހެލްތު ސެންޓަރު ގާއިމުކުރުމުގެ މަސަައްކަތް ކުރިއަށްދާ ކަމުގައި ވިދާޅުވި އެވެ.
"އިންޑިއާ ސަރުކާރުގެ ހިލޭ އެހީގެ ދަށުން އައްޑޫ ސިޓީ އިކުއެޓޯރިއަލް ހޮސްޕިޓަލްގައި މެންޓަލް ސެންޓަރެއް ގާއިމުކުރުމަށް ތައްޔާރުވަމުންވެސް އެބަދޭ" މިއުވާން ވިދާޅުވި އެވެ.
ހުޅުމާލޭގެ މެންޓަލް ހެލްތު ސެންޓަރު ގާއިމް ކޮށްފައިވަނީ ހުޅުމާލޭ ހޮސްޕިޓަލުގައެވެ. އެތަން އަންނަ މަހުގެ 10 ވަނަ ދުވަހު ހުޅުވުމަށް މަސައްކަތް ކުރަމުން އަންނަ ކަމަށް އެ ހޮސްޕިޓަލްގެ ފްރޮންޓް އޮފިސް އަދި ޕަބްލިކް ރިލޭޝަންސް މެނޭޖަރު އަބްދުﷲ މައުރޫފް ވެސް މީގެ ކުރިން ވަނީ ވިދާޅުވެފަ އެވެ.
އެދުވަހަކީ ނަފްސާނީ ސިއްހަތުގެ ދުވަހެވެ. އެތަނުގައި މިހާރު ވެސް އަންނަނީ ނަފްސާނީ ބައްޔަށް ފަރުވާ ދެމުންނެވެ.
