ހުޅުމާލޭގައި ހަތަރު މަޝްރޫއެއް ކުރިއަށްގެންދަން އެޗްޑީސީއިން ހަތަރު ކުންފުންޏަކާއިއެކު އެއްބަސްވުމުގައި ސޮއިކޮށްފި އެވެ.
މިއަދު މީރުމާ ހޮޓަލްގައި ބޭއްވި ރަސްމިއްޔާތެއްގައި ހަތަރު ކުންފުންޏަކާއިއެކު އެޗްޑީސީއިން ސޮއި ކުރީ ލޭބަރުންގެ އިމާރާތް ހެދުމަށާއި، އޮޓޯ ސެންޓަރެއް ހެދުމަށާއި، ޕާކިން އިމާރާތެއް އެޅުމުގެ އިތުރުން ޑޭ ކެއާ ސެންޓަރެއް އެޅުމަށެވެ.
އެޗްޑީސީއިން ބުނީ އެ ކުންފުންޏަކީ މީގެ 21 އަހަރު ކުރިން ސަރުކާރުގެ ބޯހިޔާވެހި ކަމުގެ މައި މަޝްރޫއު ކަމަށްވާ ހުޅުމާލެ ތަރައްގީ ކޮށް އުފާވެރި ތަނަވަސް ދިރިއުޅުމެއް މަގުފަހިކޮށްދިނުމަށް އުފެއްދި ކުންފުންޏެއް ކަމަށެވެ.
2004 ވަނަ އަހަރު ހުޅުމާލޭގައި މީހުން އާބާދުވެ މިހާތަނަށް އާދެވުނު އިރު ހުޅުމާލެ މި ވަނީ ހަނަފަސް ހުސް ބިމަކުން ރާއްޖޭގެ އެންމެ ތަނަވަސް ސިޓީއަށް ބަދަލުވެފައި ކަމަށް ވެސް އެޗްޑީސީއިން ބުނެ އެވެ.
އެޗްޑީސީއިން ބުނީ މިއަދު ސޮއި ކުރި މަޝްރޫއުތަކަކީ ކުރިއަށް އޮތްތަނުގައި ރައްޔިތުންނަށް ދިމާވެފައިވާ މައްސަލަތަކަށް ހެޔޮ ބަދަލުތަކެއް ގެނެސްދޭނެ މަޝްރޫއުތަކެއް ކަމަށެވެ.
ލޭބަރުންގެ އިމާރާތް
މިއަދު ބޭއްވި ރަސްމިއްޔާތުގައި މި މަޝްރޫއުގެ އެއްބަސްވުމުގައި އެޗްޑީސީގެ ފަރާތުން ސޮއި ކުރެއްވީ މެނޭޖިންގ ޑިރެކްޓަރ އަހުމަދު އާތިފް އެވެ. އަދި ޗައިނާގެ ރޯޓައިމްގެ ފަރާތުން ސޮއިކުރެއްވީ ކަންޓްރީ މެނޭޖަރު ޗޭންގް ޗަންގް ވޫ އެވެ.
އެޗްޑީސީއިން ބުނީ އެ އިމާރާތަކީ ރާއްޖޭގެ އެކި ކުންފުނިތަކުން މަސައްކަތް ކުރުމަށް ގެންނަ ބިދޭސީ މަސައްކަތް ތެރިންނަށް ރާއްޖޭގައި ރައްކާތެރި މާހުލެއް ގާއިމް ކޮށްދީ އެ ފަރާތްތަކުގެ ހައްގުތައް ރައްކާތެރި ކުރުމަށް ހިންގުމަށް ހަމަޖެހިފައިވާ މަޝްރޫއެއް ކަމަށެވެ.
އެ އިމާރާތުގައި 900 މަސައްކަތްތެރިން އެކޮމަޑޭޓް ކުރެވޭނެ 18 ބްލޮކް ހިމެނޭނެ ކަމަށާއި އެކޮމަޑޭޝަން ބްލޮކްތަކުގައި 4-6 މީހުންގެ ޖާގައިގެ ކޮޓަރިއާއި ފާހަނަ ބައިރިއަކާއި ނަމާދު ގެއާއި ފިހާރަ ހުންނާނެ ކަމަށް އެޗްޑީސީން ބުނެއެވެ.
އަދި އިމާރާތުގައި ބަދިގެ އަދި މެސް ހޯލް ހުންނާނީ ވަކިން އެކަމަށް ހާއްސަކޮށްފައިވާ ފަންގިފިލާ ތަކުގައި ކަމަށާއި އެ ބްލޮކްގައި ބަދިގެ ބަޔާއި އެކީ ފުޑް ސްޓޯރޭޖް އަދި މެސްރޫމްތައް ހިމެނޭނެ ކަމަށެވެ.
އޮފީސްތައް ވެސް ހުންނާނީ ހާއްސަ ފަސް ފަންގިފިލާއެއްގައި ވަކިން ކަމަށާއި އެ ތަނުގައި ސެކިއުރިޓީ ކޮޓަރިތަކާއި ކޮންފަރެންސް ހޯލް އަދި ވެހިކަލް ކޮޓާރިއެއްވެސް ހުންނާނެ ކަމަށް އެޗްޑީސީއިން ބުނެ އެވެ.
ބިދޭސީ މަސައްކަތްތެރިންގެ އިމާރާތުގެ މަޝްރޫއު މިއަދު މި ފަށަނީ ރާއްޖޭގައި މަސައްކަތް ކުރާ ބިދޭސީންނާއި އެ ފަރާތްތަކަށް ވަޒީފާދޭ ކުންފުނިތަކަށް ހަރަދު ކުޑަ ތަނަވަސް ރައްކާތެރި ބޯހިޔާވެހިކަމެއް ފޯރުކޮށްދިނުމުގެ މަގްސަދުގައި ކަމަށް ވެސް އެޗްޑީސީއިން ބުނެ އެވެ.
އޮޓޯ ސެންޓަރު
އޮޓޯ ސެންޓަރު ހިންގުމަށް އެޗްޑީސީއިން ހަވާލުކުރީ ޗައިނާ ސްޓޭޓް ކުންފުންޏާއެވެ. މިއަދު ބޭއްވި ރަސްމިއްޔާތުގައި އެޗްޑީސީގެ ފަރާތުން އެއްބަސްވުމުގައި ސޮއިކުރެއްވީ މެނޭޖިންގ ޑިރެކްޓަރ އަހުމަދު އާތިފް އެވެ. އަދި ޗައިނާ ސްޓޭޓްގެ ފަރާތުން ސޮއިކުރެއްވީ ޖެނެރަލް މެނޭޖަރު ޖަނގް ޓާއޯ އެވެ.
އެޗްޑީސީއިން އިސްނަގައިގެން ތަރައްގީ ކުރާ އޮޓޯ ސެންޓަރަކީ ބޭސްމަންޓާއެކު 5 ބުރި ހިމެނޭ 35400 ގެ އަކަ ފޫޓްގެ ޖާގައިގެ އިމާރާތެއް ކަމަށާއި އެ އިމާރާތުގައި 7 ސާވިސް ލިފްޓް ހުންނާނެ ކަމަށް އެޗްޑީސީން ބުނެ އެވެ.
އަދި ގަރާޖްތަކަށް އެ އިމާރާތުން ތަނަވަސް ޖާގަ ލިބޭނެ ކަމަށާއި އެޗްޑީސީގެ ސަސްޓޭނަބަލް މޮޑަލްގެ ދަށުން އެ އިމާރާތް އެއްކޮށް ނިންމާލެވޭއިރު ވަރޭ ފެން ނެގޭނެ ކަމަށާއި، އަދި އިރުގެ ހަކަތަ ސޯލާ ޕަވާ ބޭނުން ކުރުމުގެ އިތުރުން ކަރަންޓް ކާރުތަކަށް ހާއްސަ ޗާޖިން ސްޓޭޝަން ހުންނާނެ ކަމަށެވެ.
އޮޓާ ސެންޓަރުގެ މަޝްރޫއުގެ ސަބަބުން މާލެ ސަރަހައްދުގައި ހިންގާ ގަރާޖްތަކަށް ލުއި ފަސޭހަ ތިމާވެއްޓާ ރަށްޓެހި އޮޓޯ މޯބައިލް ރިޕެއާ އަދި ސާވިސިންގެ ހިދުމަތް ހަރުދަނާ ކަމާއެކުގައި ފޯރުކޮށް ދިނުމަށް މަގު ފަހި ވެގެންދާނެ ކަމަށް އެޗްޑީސީން ބުނެ އެވެ.
ޕާކިން އިމާރާތް
ޕާކިން ބިލްޑިންގެ އެއްބަސްވުމުގައި އެޗްޑީސީގެ ފަރާތުން ސޮއި ކުރެއްވީ މެނޭޖިންގ ޑިރެކްޓަރ އަހުމަދު އާތިފް އެވެ. އަދި ދަމާސްގެ ފަރާތުން ސޮއި ކުރެއްވީ ޑެޕިއުޓީ މެނޭޖިންގ ޑިރެކްޓަރ އަހުމަދު ސޯލިހް އެވެ.
އެޗްޑީސީން ބުނީ ދަމާސްގެ އިސްނެގުމުގެ މަތިން މިއަދު ފަށާ ޕާކިން އިމާރާތުގެ މަޝްރޫއަކީ މާލޭ ސަރަހައްދުގެ ޕާކިންގ މައްސަލައަށް ބޮޑެތި ހައްލުތަކެއް ހޯދައިދޭނެ މަޝްރޫއެއް ކަމަށެވެ.
މިއީ 24،700 އަކަފޫޓްގެ ޖާގައިގެ އިމާރާތެއް ކަމަށާއި އެ އިމާރާތުގެ 6 ފަންގިފިލާ ހާއްސަ ކުރަނީ ވެހިކަން ޕާކް ކުރުމަށް ކަމަށެވެ. އެއީ ބޭސްމަންޓް ޕާކިންގ އެކުގައި ކަމަށް ބުނެފައި ވެއެެވެ
އެ އިމާރާތުގައި ރާއްޖޭގައި ފުރަތަމަ ފަހަރަށް ވެލޭގެ ހިދުމަތް ތައާރަފް ކުރެވޭނެ ކަމަށާއި އަދި ހާއްސަ އެހީއަށް ބޭނުންވާ ފަރާތްތަކަށް ހާއްސަ ޕާކިންގގެ ހިދުމަތް ވެސް ލިބޭނެ ކަމަށެވެ.
ޑޭކެއާ ސެންޓަރު
މި އެއްބަސްވުމުގައި އެޗްޑީސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ އަހުމަދު އާތިފް އެވެ. އަދި އޭބީއޭގެ ފަރާތުން ސޮއިކުރެއްވީ މެނޭޖިން ޑިރެކްޓަރު އަބްދުﷲ ގާސިމް އެވެ.
އޭބީއޭގެ އިސް ނެގުމާއި އެއްކޮށް ހުޅުމާލޭގައި އަޅާ ޑޭ ކެއާ ސެންޓަރަކީ ވަރަށް މުހިންމު މަޝްރޫއެއް ކަމަށް އެޗްޑީސީން ބުނެ އެވެ.
އެ ސެންޓަރަކީ 3000 އަކަފޫޓްގެ ޖާގައިގެ 6 ބުރީގެ އިމާރާތެއް ކަމަށާއި އެތަނުން ޒަމާނީ ޑޭކެއާ ސެންޓަރެއްގެ ހުރިހާ ހިދުމަތްތަކެއް ލިބޭނެ ކަމަށް އެޗްޑީސީން ބުނެއެވެ.
