މިއަދު ހެނދުނު މާލޭ ގެއަކުން ދުން އަރާތީ ފުލުހުންނާއި ސިފައިން އެގޭގެ ދޮރު ވައްޓާލައިގެން ވަންއިރު އެތަނުގައި ބަނގުރާ ކައްކަން ތިއްބާ ފެނިއްޖެއެވެ.
ފުލުހުން ބުނީ ހެންވޭރު ރޯޝަނީ މަގުގައި ހުރި ގެއަކުން ދުން އަރާތީ 06:12 ކަންހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ.
ސިފައިންނާއި ފުލުހުން އެގެއަށް ގޮސް ދޮރުގައި ތެޅުމުން އެއްވެސް މީހަކު ދޮރު ނުހުޅުވުމުން ބާރުގެ ބޭނުން ކޮށްގެން އެގެއަށް ވަދެފައިވާ ކަމަށް ފުލުހުން ބުންޏެވެ.
އެގޭތެރެއިން ދުން އަރަމުން ދިޔައީ ބަނގުރާ ކައްކަމުން ދާތީކަމަށާއި ބަނގުރާ ކެއްކުމަށް ބޭނުންކުރާ ގިނަ ސާމާނުތަކެއް އެގެއިން ފެނިފައިވާ ކަމަށް ފުލުހުން ބުންޏެވެ.
ފުލުހުން ބުނީ އަދިވެސް ފުލުހުން ދަނީ އެސަރަހައްދުގައި ހަރަކާތްތެރިވަމުން ކަމަށެވެ.
ނަމަވެސް މިމައްސަލައިގައި އަދި އެއްވެސް މީހަކު ހައްޔަރުކުރިކަން ނުވަތަ ނޫންކަން ފުލުހުން ހާމައެއް ނުކުރެއެވެ.
