ތ. ދިޔަމިގިއްޔަށް ދަތުރު ކުރަމުން ދަނިކޮށް ދިޔަވި ދޯނީގައި ތިބި މީހުން ސަލާމަތްކޮށްފި އެވެ.
އެމްއެންޑީއެފްއިން ބުނީ ހަތަރު ދިވެހިންނާއެކު ތ. ދިޔަމިގިއްޔަށް ދަތުރުކުރި "މާކުރީ 7" ދޯނި ތ. ވިލިފުށީގެ ހުޅަނގު އުތުރުން 6 މޭލު ބޭރުން ދިޔަވެ އަޑިއަށްދާކަމުގެ މައުލޫމާތު ލިބުނީ މިއަދު ހެނދުނު 10:00 ޖަހާއިރު ކަމަށެވެ.
އެމްއެންޑީއެފްގެ ކޯސްޓްގާޑުން ވަނީ މާކުރީ 7 ދޯންޏައް ކައިރިކޮށް އޭގައި ތިބި މީހުން މިހާރު ސަލާމަތް ކޮށްފައި ކަމަށް އެމްއެެންޑީއެފްއިން ބުނެ އެވެ.
އެ ދޯނިން ސަލާމަތްކުރި ފަޅުވެރިން ހާލު ރަނގަޅު ކަމަށް ވެސް އެމްއެންޑީއެފްއިން ބުނެ އެވެ.
ރާއްޖޭގެ ބޮޑު ސަރަހައްދަކީ ކަނޑުކަމުގައިވާއިރު ކަނޑުމަތީގައި ނުރައްކާތެރި ހާދިސާތައް ހިނގަ އެވެ. ހާއްސަކޮށް ވިއްސާރަ މޫސުމުގައި ދޯނި ދިޔަ ވުމާއި ކަނޑަށް މީހުން ގެއްލުމުގެ ހާދިސާތައް ގިނައެވެ.
މިދިޔަ ހޮނިހިރު ދުވަހު ވަނީ ދެ ލޯންޗު ޖެހިގެން ހިނގި އެކްސިޑެންޓެއްގައި ދިވެއްސަކު ނިޔާވެފަ އެވެ.
ކަނޑުމަތީގައި ހިތާމަވެރި ހާދިސާތައް ހިނގުން މަދުކުރުމަށް ސަމާލުކަންދޭންޖެހޭ ވަރަށް ގިނަކަންތައްތައް ހުރެ އެވެ. ދަތުރު ފެށުމުގެ ކުރިން ދޯނި ރަނގަޅަށް ޗެކް ކުރުމާއި ސަލާމަތީ ހުރިހާ ވަސީލަތްތަކެއް ހުރިތޯ ބެލުމަކީ ވަރަށް މުހިންމު ކަމެކެވެ.
އަދި އެހެންވެ ކަނޑުދަތުރުކުރާއިރުގައި މޫސުން އޮތްގޮތް ބެލުމަށް ކަމާބެހޭ ފަރާތްތަކުން އިލްތިމާސް ކުރެއެވެ.
