މި މަހުން ފެށިގެން ހިޔާ ފްލެޓްތަކަށް މަހަކު ދައްކަން ޖެހޭ އަދަދު 6،300ރ. އަށް ހަމަޖައްސައި، އެ ފްލެޓުތަކަށް އަގު ދައްކަން ޖެހޭ މުއްދަތު އިތުރު ހަތް އަހަރަށް ސަރުކާރުން އިތުރު ކޮށްފި އެވެ.
ރައީސް އޮފީހުގައި ބޭއްވި ނިއުސް ކޮންފަރެންސްގައި ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ، ހިޔާ ފްލެޓްތަކުގެ ކުލި ދައްކައި ނިންމަންޖެހޭ މުއްދަތު އިތުރުކުރަން ސަރުކާރުން ނިންމީ އެ ތަނުގައި ދިރިއުޅޭ މީހުން ކުލި ދެއްކުމުގައި ލުއި ފަސޭހަކޮށްދިނުމުގެ ގޮތުން ކަމަށެވެ.
އަކްރަމް ކަމާލުއްދީން ވިދާޅުވީ ހިޔާ ފުލެޓުތަކުގައި ދިރިއުޅޭ ރައްޔިތުންނަށް ލުއި ދިނުމުގެ ގޮތުން އެ ފުލެޓުތަކަށް ދައްކަން ޖެހޭ މަހު ކުލި ހަތް އަހަރު ދުވަހުގެ މުއްދަތަށް 5،300އަށް ކުޑަކުރީކަމަށެވެ. ހިޔާ ފްލެޓްގެ އިންސްޓޯލްމަންޓް ލޯނު އަނބުރާ ދައްކަން ޖެހޭ މުއްދަތަށް ސަރުކާރުން އިތުރު ކޮށްދިނީ ހަތް އަހަރުގެ މުއްދަތެކެވެ. ލޯނު އަނބުރާ ދައްކަން ކަނޑައަޅާފައި އޮތީ 25 އަހަރެވެ. އޭގެ ތެރެއަށް ހަތް އަހަރު އިތުރު ކޮށްދިނީ އެވެ.
"ކުލި ކުޑައެެއް ނޫން މި ކުރީ، ކުލި ދައްކަން ޖެހޭ މުއްދަތު އިތުރު ކޮށްދިނީ،" އަކްރަމް ވިދާޅުވި އެވެ.
އާބަންކޯގެ މެނޭޖިން ޑިރެކްޓަރު އަހްމަދު އާތިފު ވިދާޅުވީ، ހިޔާ ފްލެޓަށް މަހަކު ދައްކަން ޖެހޭ ވަރު ކުޑަކުރިޔަސް، މެއިންޓެނަންސް ފީ އަށް އެއްވެސް ބަދަލެއް ނާންނާނެ ކަމަށެވެ. މެއިންޓެނަންސް ފީގެ ގޮތުގައި މިހާރު ދައްކަމުން އަންނަ 1،000ރ. ދެން ވެސް ދައްކަން ޖެހޭނެ ކަމަށް އޭނާ ވިދާޅުވި އެވެ. އެހެންވެ، މެއިންޓަނެންސް ފީއާ އެކު ކޮންމެ މަހަކު 6،300ރ. ދައްކަން ޖެހޭނެ އެވެ.
މި ބަދަލާ އެކު ހަތް އަހަރުގެ މުއްދަތަށް އެ ތަނުގެ މަހު ކުލީގެ ގޮތުގައި ދައްކަން ޖެހޭނީ 5،300 ރުފިޔާއެވެ. މެއިންޓެނަންސް ފީއާ އެކު މަހަކު 8،500 ރުފިޔާ މިހާރު ހިޔާ ފުލެޓުތަކުގެ ކުލީގެ ގޮތުގައި ނަގައެވެ. ނަމަވެސް، މިހާރު ގެނެވުނު ބަދަލާ އެކު މެއިންޓެނަންސް ފީއާ އެކު ދައްކަން ޖެހޭނީ 6،300 ރުފިޔާއެވެ.
ހިޔާ ފްލެޓްތަކުގެ ކުލި މަހަކު 5،000ރ. އަށް ކުޑަކޮށްދިނުމަށް ގޮވާލައި އެ ތަނުގައި ދިރިއުޅޭ މީހުން އެކި ފަހަރު މަތިން މުޒާހަރާ ވެސް ކުރި އެވެ.
