ހުސްވެފައިވާ ކޮމިޝަނަރ އޮފް ޕޮލިސްގެ މަގާމަށް އެސިސްޓެންޓް ކޮމިޝަނަރ، އަލީ ޝުޖާއު އާއި އެސިސްޓެންޓް ކޮމިޝަނަރ، އިސްމާއީލް ނަވީން ކުރިމަތިލައްވައިފި އެވެ.
މިނިސްޓްރީ އޮފް ހޯމްލޭންޑް ސެކިއުރިޓީން ބުނީ ކޮމިޝަނަރ އޮފް ޕޮލިސްގެ މަގާމަށް މުއްދަތު ހަމަވިއިރު ކުރިމަތި ލައްވާފައިވަނީ ދެ ބޭފުޅުން ކަމަށެވެ. ކޮމިޝަނަރ އޮފް ޕޮލިސްގެ މަގާމަށް ކުރިމަތިލުމަށް ހުޅުވާލާފައިވަނީ މިމަހުގެ 14 ވަނަ ދުވަހުއެވެ. މި މަގާމަށް ކުރިމަތިލުމުގެ ސުންގަނޑި މިއަދު މެންދުރު 12 ޖެހިއިރު އެވެ. އެއީ އެސިސްޓެންޓް ކޮމިޝަނަރ، އަލީ ޝުޖާއު އާއި އެސިސްޓެންޓް ކޮމިޝަނަރ، އިސްމާއީލް ނަވީން ކަމަށް އެ މިނިސްޓްރީން ބުނެ އެވެ.
ކޮމިޝަނަރ އޮފް ޕޮލިސްގެ މަގާމަށް ކުރިމަތިލެވޭނީ އެސިސްޓެންޓް ކޮމިޝަނަރުގެ ރޭންކުން ފެށިގެން މަތީގެ ރޭންކްތަކުގައި މި ވަގުތު ތިއްބެވި އޮފިސަރުންނަށެވެ.
ޤާނޫނުގައި ބުނާ ގޮތުގައި ސީޕީގެ މަގާމަށް ބޭފުޅަކު އައްޔަން ކުރާނީ އެމަގާމަށް ކުރިމަތިލާ ފަރާތްތަކާއި ޕޮލިސް ބޯޑުން އިންޓަވިއުކޮށް، ގާބިލުކަން ވަޒަން ކުރުމަށްފަހުއެވެ. އެހެން ކަމުން ޕޮލިސް ބޯޑުން ވަޒަންކޮށް، ހޯމް މިނިސްޓަރަށް ނަންތައް ހުށަހެޅުމުން ސީޕީގެ މަގާމަށް މިނިސްޓަރުގެ ލަފާގެ މަތިން ބޭފުޅުން އައްޔަން ކުރައްވާނީ ރައީސުލްޖުމްހޫރިއްޔާ އެވެ.
މިދިޔަ މަހުގެ 15 ވަނަ ދުވަހުން ފެށިގެން ޕޮލިސް ކޮމިޝަނަރުގެ މަގާމު ވަނީ ހުސްވެފައެވެ. އެމަގާމު ހުސްވެފައިވަނީ ކުރިން އެމަގާމުގައި ހުންނެވި މުހައްމަދު ހަމީދު(އެމްސީ ހަމީދު)ރިޓަޔަރ ކުރެއްވުމުންނެވެ، ހަމީދު މަގާމުން ރިޓަޔާ ކުރެއްވުމާއި ގުޅިގެން މިހާރު އެކްޓިން ކޮމިޝަނަރުގެ މަގާމު އަދާ ކުރައްވަމުން ގެންދަވަނީ އެސިސްޓެންޓް ކޮމިޝަނަރ އޮފް ޕޮލިސް، ފަރުހާދު ފިކުރީއެވެ.
