ރާއްޖޭގެ ޝަރުއީ ދާއިރާއަށް މީހުން ބިނާ ކުރުމުގެ ގޮތުން ޖުޑިޝަރީ ސާވިސް ކޮމިޝަން (ޖޭއެސްސީ) އިން ކުރިއަށް ގެންދިޔަ "ޖުޑިޝަރީ ފޯ ޖޫނިއާސް" ޕްރޮގްރާމް ނިންމާލައިފިއެވެ.
މިމަހުގެ 14 ވަނަ ދުވަހުން 8 ދުވަހުގެ މުއްދަތަކަށް ކުރިއަށް ގެންދިޔަ މި ޕްރޮގްރާމަކީ ޔޫއެންޑީޕީ މޯލްޑިވްސް، ސުޕްރީމް ކޯޓް، ހައިކޯޓް، އެޓާނީ ޖެނެރަލް އޮފީސް، ޕްރޮސެކިއުޓަރ ޖެނެރަލް އޮފީސް، ކްރިމިނަލް ކޯޓް އަދި ސިވިލް ކޯޓް ގުޅިގެން ކުރިއަށް ގެންދިޔަ ޕްރޮގްރާމެކެވެ.
މި ޕްރޮގްރާމް ނިންމާލުމަށް އިއްޔެ ސުޕްރީމް ކޯޓުގައި ބޭއްވި ކުޑަ ހަފްލާއެއްގައި ވަނީ ޕްރޮގްރާމްގައި ބައިވެރިވި ފަރާތްތަކަށް ސެޓްފިކޭޓް ހަވާލުކޮށްފައެވެ. ޕްރޮގްރާމްގެ ބައިވެރިންނަށް ސެޓްފިކޭޓް ހަވާލުކޮށްދެއްވާފައިވަނީ ރާއްޖޭގެ އުއްތަމަ ފަނޑިޔާރު، އަހުމަދު މުއުތަސިމް އަދުނާނެވެ.
މި ޕްރޮގްރާމް ހާއްސަކޮށްފައިވަނީ އުމުރުން 15 އަހަރާއި 20 އަހަރާއި ދެމެދުގެ ޒުވާނުންނަށެވެ. މި ފަހަރުގެ ޕްރޮގްރާމްގައި 40 ޒުވާނަކު ބައިވެރިވި އެވެ. މި ޕްރޮގްރާމުގައި ޒުވާނުން މި ދާއިރާއަށް ޝައުގުވެރިވާ މިންވަރު އިތުރުކޮށް، އެ ދާއިރާގެ ތެރެއަށް ވެއްދުމަށްޓަކައި މަސައްކަތްތަކެއް ކޮށްފައިވާ ކަމަށް ޖޭއެސްސީން ވަނީ ބުނެފައެވެ.
