މި ސަރުކާރުގެ ވަޒީރުންނަށް ރުހުން ދިނުމުގެ މައްސަލަ އާއި މެދު ގޮތެއް ނިންމުމަށް މިއަދު ބާއްވަން އުޅުނު ސަރުކާރުގެ މަސްޢޫލިއްޔަތު އަދާކުރާ މިންވަރުބަލާ ކޮމިޓީގެ ބައްދަލުވުން ކެންސަލް ކޮށްފި އެވެ.
ރައްޔިތުންގެ މަޖިލީހުގެ އިދާރާއިން ބުނީ އެ ކޮމިޓީ ކެންސަލްކޮށްފައިވަނީ ކޯރަމް ހަމަނުވެގެން ކަމަށެވެ. އެ ކޮމިޓީ އެޖެންޑާ ކޮށްފައިވަނީ މިއަދު ހެނދުނު 9:00 އަށެވެ.
ރައީސް ޑރ. މުހައްމަދު މުއިއްޒުގެ ސަރުކާރުގައި 22 ވަޒީރުން ތިއްބަވަ އެވެ. މީގެ ކުރިން އެކޮމިޓީން ހުރިހާ ވަޒީރުންނަށް ރުހުން ދޭން ނިންމައި މަޖިލީހުގެ ތަޅުމަށް ފޮނުވި އެވެ. އެ މައްސަަލަ އަނބުރާ ކޮމިޓީ އަށް ފޮނުވާލީ ތުޅާދޫ ދާއިރާގެ މެމްބަރު ހިސާން ހުސައިން ނިޒާމާއި ބެހޭ މައްސަލަ އެއް ނަންގަވާ ފާހަގަކުރެއްވި ކަންކަމަށް ބެއްލެވުމަށް ފަހުގައެވެ. ހިސާން ވިދާޅުވީ ވަޒީރުންނަށް ރުހުން ދިނުމުގެ މައްސަލަ ދިރާސާކޮށް، ސަރުކާރުގެ މަސްއޫލިއްޔަތު އަދާކުރަ މިންވަރު ބަލާ ކޮމިޓީން އެކުލަވައިލި ރިޕޯޓް އޮތީ މަޖިލީހުގެ ގަވާއިދުގެ 200 ވަނަ މާއްދާގެ ވ، ރ، ކ އަދި އ ގައި ބަޔާންކޮށްފައި އޮތް ހަމަތަކާއި ހިލާފަށް ކަމަށެވެ. އެ މާއްދާތަކުގައި ހުރި ކަންކަން ފުރިހަމަ ނުވާ ރިޕޯޓަކަށް ވާތީ އެ ރިޕޯޓަށް ފުރިހަމަ ކުރުމަށް އަލުން އަނބުރާ ކޮމިޓީއަށް ފޮނުވީ އެވެ.
ރައްޔިތުންގެ މަޖިލީހުގެ މެޖޯރިޓީ އޮތީ އެމްޑީޕީއަށެވެ. އެ ޕާޓީގެ ޕާލިމަންޓަރީ ގްރޫޕުގައި 56 މެންބަރަކު ހިމެނިވަޑައިގަންނަވަ އެވެ.
