ރައީސް ޑރ. މުހައްމަދު މުއިއްޒުގެ ސިޔާސީ ވައުދުގައި ހިމެނިވަޑައިގަންނަވާ ރާއްޖޭން ބޭރުގައި ކިޔަވާ ދިވެހި ދަރިވަރުންނަށް ބޭންކް އޮފް މޯލްޑިވްސްގެ ކްރެޑިޓު އަދި ޑެބިޓު ކާޑުން މަހަކު 1،200 ޑޮލަރު ނެގޭ ގޮތަށް ނިންމާފައިވާ ކަމަށް ސަރުކާރުން މިއަދު އިއުލާނުކޮށްފި އެވެ.
ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމެއްގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަބްދުﷲ ނާޒިމް އިބްރާހީމް ވިދާޅުވީ ބޭރުގައި ކިޔަވާ ދަރިވަރުންނަށް މިހާރު މަހަކު 750 ޑޮލަރު ނެގޭތީ އެކަމުގެ ދަތިކަމާއި ކަންބޮޑުވުން ބޮޑު ކަމަށެވެ. 1،200 ޑޮލަރު ނެގޭ ގޮތަށް ނިންމާފައިވަނީ އަންނަ ފެބްރުއަރީ މަހުން ފެށިގެން ކަމަށް ނާޒިމް ވިދާޅުވި އެވެ.
ނާޒިމް ވިދާޅުވީ ޑޮލަރު ލިމިޓް ބޮޑުކުރަން ނިންމީ ހަމަ އެކަނި ބޭރުގެ ކިޔަވާކުދިންނަށް ކަމަށެވެ. އޭގެ ތެރޭގައި ސަރުކާރުގެ ލޯނުގައި ކިޔަވަމުންދާ ދަރިވަރުންނާއި އަމިއްލައަށް ކިޔަވަންގޮސް ތިބޭ ދަރިވަރުން ހިމެނޭކަމަށް ވިދާޅުވި އެވެ. އަދި އެއީ ފުރަތަމަ މަރުހަލާ ކަމަށެވެ.
ބޭރުގައި ކިޔަވާ ދަރިވަރުންނަށް ލިމިޓް ބޮޑުކުރި ނަމަވެސް ކްރެޑިޓް ކާޑު ބޭނުން ކޮށްގެން އޮންލައިން މުއާމަލާތުތައް ހިންގޭ ލިމިޓު އާންމުންނަށް އަދިވެސް ބޭރުގެ މުއާމަލާތުތައް ހިންގެނީ ޑެބިޓް ކާޑު ބޭނުންކޮށްގެން މަހަކު 250 ޑޮލަރާއި ހަމައަށެވެ. އަދި ކްރެޑިޓް ކާޑު ބޭނުން ކޮށްގެން 750 ޑޮލަރާއި ހަމައަށެވެ.
