ކީރިތި ޤުރުއާނާއި ބެހޭ މަރުކަޒު ހިންގެވިތަން އިސް ރަށްވެހިންގެ އެންމެ ފުރަތަމަ މަރުކަޒެއްގެ ގޮތުގައި ބަދަލު ކުރަން ނިންމާފައިވާ ކަމަށް ސަރުކާރުން ބުނެފި އެވެ.
ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، ޢަބްދުﷲ ނާޒިމް އިބްރާހީމް ވިދާޅުވީ،އިސްރަށްވެހިންނަށް ހާއްސަ އިޖުތިމާއީ މަރުކަޒުތަކެއް ރާއްޖޭގެ އެކި ސަރަހައްދުތަކުގައި ގާއިމު ކުރުމުގެ މަސައްކަތް ސަރުކާރުން ފަށާފައިވާ ކަމަށާއި ކީރިތި ޤުރުއާނާއި ބެހޭ މަރުކަޒު ހިންގެވިތަން އިސް ރަށްވެހިންގެ އެންމެ ފުރަތަމަ މަރުކަޒެއްގެ ގޮތުގައި ބަދަލު ކުރަން ނިންމާފައިވާ ކަމަށެވެ.
ނާޒިމް ވިދާޅުވީ ދައުލަތަށް ގިނަ ހިދުމަތްތަކެއް ކުރައްވައި، ރިޓަޔާ ކުރައްވާފައިވާ ބޭފުޅުންގެ ނަފްސާނި އަދި ޖިސްމާނީ ދުޅަހެޔޮ ކަމަށް އެހީތެރިކަން ފޯރުކޮށްދިނުމަކީ ރައީސް، ޑރ. މުހައްމަދު މުއިއްޒުގެ ސިޔާސަތެއް ކަމަށެވެ.
ނާޒިމް ވިދާޅުވީ، އެކަން ކުރުމުގައި މިނިސްޓްރީ އޮފް ހެލްތް އާއި ޔޫތް މިނިސްޓްރީ އާއި ސްޕޯޓްސް މިނިސްޓްރީގެ އިތުރުން ކަމާއި ބެހޭ އިދާރާތްތަކުގެ ލަފާ ލިބޭނެ ކަމަށާއި އެކަން ފެށިގެންދާނީ އެ މިނިސްޓްރީތަކުގެ އެހީއާއި އެކު ކަމަށް ނާޒިމް ވިދާޅުވިއެވެ.
