މިއަދު ކުުރިޔަށްދާ ޕީޕީއެމް/ޕީއެންސީ ކޯލިޝަންގެ، ރައްޔިތުންގެ މަޖިލީހުގެ އިންތިޚާބުގެ ޕްރައިމަރީ މިނިވަންކަމާއި، އިންސާފުވެރިކަމާއެކު ބޭއްވޭ ދެފުށް ފެންނަ އިންތިޚާބަކަށް ހެދުމަށް އިލެކްޝަންސް ކޮމިޝަނުން އިލްތިމާސް ކޮށްފި އެވެ.
މިއަދު ބާއްވާ ޕްރައިމަރީގައި މާލޭގެ ބައެއް ވޯޓުލާ މަރުކަޒުތަކުގައި މައްސަލަ ބޮޑުވެ ހަމަނުޖެހުން ވަނީ ހިނގައިފަ އެވެ.
އެކަމާއި ގުޅިގެން އިލެކްޝަންސް ކޮމިޝަންގެ ނާއިބު ރައީސް އިސްމާއިލް ހަބީބު ކުރެއްވި އެކްސް ޕޯސްޓިގައި ވިދާޅުވީ، މިއިން ތިޚާބުގައި ކެންޑިޑޭޓުންނާއި ވޯޓުލާމީހުންގެ ޙައްޤުތައް ރައްކާތެރިކޮށް، އަމާންކަމާއި އޮމާންކަމާއެކު އިންތިޚާބުގެ ހުރިހާ ކަމެއް ގެންދެވުމަށް އިލެކްޝަންސް ކޮމިޝަނުން އެދޭކަމުގަ އެވެ.
މިއަދުގެ ހަމަނުޖެހުމުގެ ތެރެއިން ކުރިން ވޯޓުލާ ލިސްޓްގައި ނަން އޮތް ބައެއް މީހުންގެ ނަންތައް އެންމެ ފަހު ވަގުތު އުނިކޮށްފައިވާ ކަމަށް ބުނެ ވޯޓުލާން ބަހައްޓާފައިހުރި ފޮއްޓެއް ވަނީ އެއްލާލައިފަ އެވެ. މާލޭގައި ހަމަނުޖެހުން ހިންގި ނަމަވެސް، ރަށްރަށުގައި ޕްރައިމަރީގެ ވޯޓުލުން އަދި މިހާތަނަށް ކުރިއަށް ދަނީ ވަރަށް ސުލްހަވެރިކަމާ އެކު ކަމަށް ޕީއެންސީން ވަނީ ބުނެފަ އެވެ.
އަންނަ މާޗު މަހު 17 ގައި ބާއްވާ ރައްޔިތުންގެ މަޖިލީހުގެ އިންތިހާބުގައި ޕީޕީއެމް/ޕީއެންސީގެ ފަރާތުން ވާދަކުރާނެ ކެންޑިޑޭޓުން ކަނޑައެޅުމަށް ބާއްވާ އެ ކޯލިޝަންގެ މަޖިލިސް ޕްރައިމަރީގެ ވޯޓުލުން ފަށާފައިވަނީ މިއަދު 10:00ގަ އެވެ. މިއަދު ހަވީރު 5 ޖެހުމާއި ހަމައަށް ވޯޓުލުން ކުރިއަށްދާނެ ކަމަށް އެ ކޯލިޝަނުން ވަނީ ބުނެފަ އެވެ.
ކޯލިޝަނުން ބުނި ގޮތުގައި 73 ދާއިރާއެއްގެ ވޯޓުލުން މިއަދު ކުރިއަށްދާނެ އެވެ. އަދި އެކި ދާއިރާތަކުން 283 ކެންޑިޑޭޓުން ވާދަކުރާ ކަމަށެވެ.
