ރައްޔިތުންގެ މަޖިލީހުގެ މައިނޯރިޓީ ޕާޓީއަށް ވެރިކަންކުރާ ޕީއެންސީ ވެއްޖެ އެވެ.
މިއަދު ދައުރުން ބޭރުން ބޭއްވި މަޖިލިސް ޖަލްސާގައި އެކަން އިއުލާން ކުރެއްވީ މަޖިލިސް ރައީސް މުހައްމަދު އަސްލަމެވެ.
މަޖިލީސް އެކުލެވިގެންވާ ގޮތަށް ގެނައި ބަދަލުތައް އިއުލާންކުރައްވައި އަސްލަމް ވިދާޅުވީ މަޖިލީހުގެ މެޖޯރިޓީ ޕާޓީއަކީ އެމްޑީޕީކަމަށާއި ޕީއެންސީ އަކީ މަޖިލީހުގެ މައިނޯރިޓީ ޕާޓީކަމަށެވެ.
މިހާރު މަޖިލީހުގައި މެންބަރުން އެކުލެވިގެންވާ ގޮތަށް ބަލާއިރު އެމްޑީޕީގައި 44 މެންބަރުން، ޕީއެންސީގައި 14 މެންބަރުން، ދަ ޑިމޮކްރެޓްސްގައި 13 މެންބަރުން، ޕީޕީއެމް އާއި އެމްޑީއޭ އަދި ޖޭޕީގައި ކޮންމެ ޕާޓީއެއްގައި 2 މެންބަރުން ތިއްބެވި އިރު، އަމިއްލަ މެންބަރުންގެ ގޮތުގައި 3 މެންބަރަކު އެބަ ތިއްބެވިއެވެ.
މި ބަދަލުތަކާއެކު މަޖިލީހުގެ މައިނޮރިޓީ ލީޑަރަކީ ޕީއެންސީގެ ޕާލިމެންޓްރީ ގްރޫޕުގެ ލީޑަރު، ފޮނަދޫ ދާއިރާގެ މެންބަރު މޫސާ ސިރާޖުކަމަށް މަޖިލީހުގެ ރައީސް އަސްލަމް ވަނީ އިޢުލާންކުރައްވާފައެވެ.
ދާދިފަހުން އެމްޑީޕީގެ ގިނަ އަދަދެއްގެ މެންބަރުން ޕީއެންސީއަށް ވަނީ ސޮއިކޮށްފަ އެވެ.
