މި ސަރުކާރުގެ ވަޒީރުންނަށް ރުހުން ދިނުމަށް މިރޭ 8 ޖެހިއިރު ޖަލްސާ ފެށުމާއެކު ސަރުކާރަށް ނިސްބަތްވެވަޑައިގަންނަވާ މެމްބަރުން މަޖިލީހުގެ ރައީސް މުހައްމަދު އަސްލަމަށް ހުރަސް އަޅަައި، ރިޔާސަތުގެ މޭޒުގައި އިން މައިކު ނަގައިފި އެވެ.
ޖަލްސާ ފެށުމާއިއެކު ޕީޕީއެމް/ޕީއެންސީގެ ބައެއް މެމްބަރުން ވަނީ އަސްލަމް ކައިރިއަށް ވަޑައިގެން ދުންމާރި ފުމެން ފައްޓަވައިފައެވެ. މަންޒަރުތަކުން ފެންނަ ގޮތުގައި މައިކު ނަގައިގެން ގެންދިޔައީ ކޮމަންޑޫ ދާއިރާގެ މެމްބަރު މުހައްމަދު ރާޝިދެވެ. އޭނާއަކީ އެމްޑީޕީގެ ޓިކެޓްގައި އިންތިހާބު ވުމަށް ފަހު ވެރިކަން ބަދަލުވުމާ އެކު ވެރިކަން ކުރާ ޕީއެންސީއަށް ބަދަލުވި މެމްބަރެކެވެ.
މިއަދު 1:30 އަށް ތާވަލު ކުރި ޖަލްސާ ވެސް ކުރިއަށް ނުގެންދެވުނީ ސަރުކާރަށް ނިސްބަތްވެވަޑައިގަންނަވާ މެމްބަރުން ޖަލްސާއަށް ހުރަސް އެޅުއްވުމުން ނެވެ.
މިވަގުތު އަނެއްކާ ވެސް މަޖިލިސް އޮތީ ހުސް ވަގުތުކޮޅަކަށް މެދުކަނޑާލާފަ އެވެ.
ވަޒީރުންނަށް ރުހުން ނުދޭން އެމްޑީޕީން ނިންމުމާ އެކުގައި ސަރުކާރަށް ތާއީދު ކުރާ މީހުން ދަނީ މަޖިލިސް ކުރާ ގޭ ކައިރީގައި މިރޭ ވެސް މުޒާހަރާ ކުރަމުންނެވެ.
އެމްޑީޕީން ރުހުން ނުދޭން ނިންމީ ބަންޑާރަ ނައިބު އަހުމަދު އުޝާމާއި އިކޮނޮމިކް މިނިސްޓަރު މުހައްމަދު ސައީދާއި ހައުސިން މިނިސްޓަރު ޑރ. އަލީ ހައިދަރާއި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދަށެވެ. ޑިމޮކްރެޓްސް އިން ރުހުން ނުދޭން ނިންމާފައި ވަނީ އުޝާމާއި ހައިދަރާއި ޝަހީމްގެ އިތުރުން ފޮރިން މިނިސްޓަރު މޫސާ ޒަމީރަށެވެ.
