ވަޒީރުންނަށް ރުހުން ދިނުމަށް މިއަދު ހެނދުނު 11:00 ގައި ރައްޔިތުންގެ މަޖިލީހުގެ ޖަލްސާއެއް ބޭއްވުމަށް ތާވަލު ކޮށްފި އެވެ.
މަޖިލީހުގެ ދައުރުގެ ބޭރުން ބާއްވާ ދެވަނަ ޖަލްސާގެ އެޖެންޑާގައި އޮތީ ވަޒީރުންނަށް ރުހުން ދިނުމާއި ވޯޓަށް އެހުމެވެ.
އިއްޔެ ބޭއްވި މަޖިލީހުގެ ޖަލްސާގައި ވެސް ވަޒީރުންނަށް ރުހުން ދިނުމަށް ޖަލްސާ ބޭއްވުމަށް މަސައްކަތް ކުރި އެވެ. ނަމަވެސް ސަރުކާރުގެ މެމްބަރުން އެކަމަށް ހުރަސް އެޅުމުން ވޯޓުލުން ކުރިއަށް ގެންދެވޭ ގޮތް ވަނީ ނުވެފަ އެވެ.
މި ސަރުކާރުގެ ބައެއް ވަޒީރުންނަށް ރުހުން ނުދިނުމަށް އެމްޑީޕީ އާއި ޑިމޮކްރެޓްސް އިން ވަނީ ނިންމާފަ އެވެ. އެމްޑީޕީގެ ޕާލަމެންޓްރީ ގްރޫޕުން މިއަދު ނިންމާފައި ވަނީ ބަންޑާރަ ނައިބު އަހުމަދު އުޝާމާއި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި ހައުސިން މިނިސްޓަރު ޑރ. އަލީ ހައިދަރާއި އިކޮނޮމިކް މިނިސްޓަރު މުހައްމަދު ސައީދަށް ރުހުން ނުދިނުމަށެވެ.
