ރައްޔިތުންގެ މަޖިލީހުގެ ސަލާމަތާއި ރައްކާތެރިކަން ގެއްލުނު ސަބަބު ހޯދުމަށް، ރައްޔިތުންގެ މަޖިލީހުގެ ގައުމީ ސަލާމަތާ ބެހޭ ކޮމިޓީ (241 ކޮމެޓީ) އަށް އެ މައްސަލަ ހުށަހެޅުމަށް އެމްޑީޕީން ނިންމައިފިއެވެ.
ރޭ މަޖިލިސް ނިންމާލިތަނާ އެމްޑީޕީން ބޭއްވި ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ ނައިބު ރައީސް އަދި ހޯރަފުށީ ދާއިރާގެ މެންބަރު އަޙްމަދު ސަލީމް ވިދާޅުވީ މަޖިލީހުގެ ގޯތި ތެރެއަށް ބައެއް ބޭފުޅުން ވެންނެވިކަން އެނގިވަޑައިގަންނަވާ ކަމަށާއި، މަޖިލީހަށް ވަދެ ނުކުތުމުގައި އެއްވެސް އުސޫލެއް ނެތި ހިނގަމުންދިޔަތަން ފެނިވަޑައިގެންނެވި ކަމަށެވެ.
އަދި ސަލާމަތީ ބާރުތަކުން އެބޭފުޅުންގެ ޚިދުމަތް ފުރިހަމަ ގޮތުގައި އަދާކުރެއްވި ކަމަށް ޤަބޫލުނުކުރައްވާ ކަމަށާއި އޭގެ ސަބަބުން މަޖިލީހުގެ ރައީސް އަދި މެންބަރުން ތިއްބެވީ ވަރަށް ބޮޑު ކަންބޮޑުވުމަކާއި ބިރުވެރިކަމެއްގެ ތެރޭގައި ކަމަށް ސަލީމު ވިދާޅުވި އެވެ. އެހެން ކަމުން އެމައްސަލަ ބަލައި ދިނުމަށް ހުށައަޅުއްވާނެ ކަމަށް ވިދާޅުވި އެވެ.
މަޖިލިހުގެ އިދާރާ ދޮށުގައި އިއްޔެ އާއި ރޭ ސަރުކާރަށް ސަޕޯޓުކުރާ ފަރާތްތަކުން ކުރިއަށް ދިޔަ މުޒާހަރާގެ ބައިވެރިން މަޖިލިހުގެ ގޭގެ ވަށާފާރުމައްޗަށް އަރައި ގޯތި ތެރެއަށް އެކި އެއްޗެހި އުކާފައިވެ އެވެ.
މި ސަރުކާރުގެ ބައެއް ވަޒީރުންނަށް ރުހުން ނުދިނުމަށް އެމްޑީޕީ އާއި ޑިމޮކްރެޓްސް އިން ނިންމާފައިވާތީ، މަޖިލީހުގެ ޖަލްސާ ކުރިއަށް ގެންދިއުމަށް ސަރުކާރަށް ތާއީދު ކުރައްވާ މެމްބަރުން ވަނީ ހުރަސް އަޅައިފައެވެ.
