ރާއްޖެއިން ލަންކާއަށް ބަލިމީހުން އެއާ އެމްބިއުލާންސްގައި ގެންދިއުމުގެ ހިދުމަތް ފަށަން ނިންމަވައިފައިވަނީ މިހާރު ރަސްމީ ދަތުރުފުޅެއްގައި ލަންކާއަށް ވަޑައިގެން އުޅުއްވާ ރާއްޖޭގެ ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން، ލަންކާގެ މިނިސްޓަރު އޮފް ޕޯޓްސް، ޝިޕިން އެންޑް އެވިއޭޝަން މިނިސްޓަރު ނިރްމަލަ ސްރިޕަލަ ޑިސިލްވާއާއި ކުރެވުނު މަޝްވަރާއަށް ފަހު އެވެ.
ބައްދަލުވުމަށް ފަހު މިނިސްޓަރު އަމީން "އެކްސް" ކުރެއްވި ޕޯސްޓެއްގައި ވިދާޅުވީ، ދެ މިނިސްޓްރީގެ ގުޅުން އާލާކުރުމަށް ކާމިޔާބު މަޝްވަރާތަކެއް ކުރެވުނު ކަމަށެވެ.
އަދި ހާއްސަކޮށް، ރާއްޖެއާ ލަންކާއާ ދެމެދު މެޑް-އެވަކް ފްލައިޓްތައް ފެށުމަށް ހުއްދަތައް ދިނުމުގެ މަރުހަލާ ވަގުތުން ފެށުމުގެ އޮނިގަނޑެއް އެކުލަވާލުމަށް އެއްބަސްވެވުނުކަމަށް މިނިސްޓަރު ވިދާޅުވި އެވެ.
ލަންކާއަށް އެއާ އެމްބިއުލާންސްގެ ހިދުމަތް ފަށަން ތައްޔާރުވެފައި މިވަނީ ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ދަތުރުފުޅަށް ފަހު ރާއްޖެ ވަޑައިގެން މާޗު މަހުގައި އެއާ އެމްބިއުލާންސް ޚިދުމަތް ފެށުމަށް ވާންޖެހޭ ތައްޔާރީތައް ވަމުންދާ ކަމަށް ވިދާޅުވެފައިވަނިކޮށެވެ. އެ ހިދުމަތް މާޗުގައި ފެށުމަށްފަހު ބަލިމީހުން ރަށްރަށުން މާލެއަށް ގެނައުމުގައި އިންޑިއާގެ އަސްކަރިއްޔާއިން ރާއްޖޭގައި އޮޕަރޭޓުކުރާ އުޅަނދުފަހަރު ބޭނުންކުރުން އެކީ ހުއްޓައިލެވޭނެ އެވެ.
