ޕްރޮސެކިއުޓާ ޖެނެރަލް ހުސައިން ޝަމީމަށް މިއަދު ހެނދުނު ބަޔަކު ދިން ހަމަލާއަކީ ސިޔާސީ މަގުސަދެއްގައި ދިން ހަމަލާއެއް ކަމަށް ކުރީގެ ރައީސް އިބްރާހިމް މުހައްމަދު ޞާލިޙް ވިދާޅުވުމުން، އެ މައްސަލައިގައި އެނގިވަޑައިގަންނަވާ މައުލޫމާތުތައް ފުލުހުންނާ ހިއްސާކޮށްދެއްވަން އެ މަނިކުފާނުގެ ކިބައިން ހޯމް މިނިސްޓަރު އަލީ އިހުސާން އެދިވަޑައިގެންފިއެވެ.
އެ ހަމަލާއާ ގުޅިގެން މިއަދު 'އެކްސް'ގައި ކުރެއްވި ޕޯސްޓެއްގައި ސޯލިހު ވަނީ ޕީޖީ ޝަމީމަށް ދިން ހަމަލާއަކީ ސިޔާސީ މަގްސަދެއްގައި ބަޔަކު ހިންގި އަނިޔާވެރި އަމަލެއްގެ ގޮތުގައި ސިފަކުރައްވައިފަ އެވެ. އަދި މިފަދަ އަމަލުތަކަށް ޑިމޮކްރެޓިކް ވެއްޓަކުން އެއްވެސް ޖާގައެއް ނޯންނާނެ ކަމަށް ވެސް އެމަނިކުފާނު ވަނީ ވިދާޅުވެފަ އެވެ.
އެއަށް ރައްދު ދެއްވައި އަލީ އިހުސާން ވިދާޅުވެފައިވަނީ، ޕީޖީ ޝަމީމަށް ދިން ހަމަލާ ފުލުހުން ތަހުގީގު ކުރަމުން ދަނިކޮށް، އެ ހަމަލާ ދީފައިވަނީ ސިޔާސީ މަގުސަދެއްގައި ކަމަށް ކުރީގެ ރައީސް ސާލިހުވެވަޑައިގަންނަވާނީ އެ ހަމަލާއާއި ގުޅުންހުރި މައުލޫމާތު އެމަނިކުފާނަށް އެނގިވަޑައިގަންނަވާތީކަމަށް ގަބޫލު ކުރައްވާ ކަމުގައެވެ.
ޕީޖީ ޝަމީމަށް ހަމަލާ ދިނީ ދެ މީހުން ކަމަށާއި އެ ހަމަލާގައި އޭނާގެ ވައަތުގެ ކަށިގަނޑުގައި ރެނދު ލާފައިވާ ކަަމަށް ޕީޖީ އޮފީހުން ވަނީ ބުނެފަ އެވެ. އެ ހަމަލާއާ ގުޅިގެން އޭޑީކޭ ހޮސްޕިޓަލްގައި ފަރުވާ ހޯއްދަވަމުން ގެންދަވާ ޝަމީމްގެ ހާލު މިހާރު ރަނގަޅުކަމަށް ވެސް އޮފީހުން ބުނެ އެވެ.
