ގއ.ވިލިނގިލިން ހޯއްގޮވާ ކެއްސުން ނުވަތަ ޕަޓޫސިސް ޖެހުނު މީހުންގެ އަދަދު ފަހަކަށް އަރާފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފި އެވެ.
އެޗްޕީއޭ އިން ބުނީ ވިލިނގިލީގައި ބަލި ފެތުރުން، މަދު ކުރުމަށް ގއ.އަތޮޅު ހޮސްޕިޓަލްގައި ޓާސްކް ފޯހެއް އެކުލަވާލައި، ރަށުގެ އެހެނިހެން ސެކްޓަރުތަކުގެ ފަރާތްތަކުގެ އެއްބާރުލުމާއެކު ބަލި ފެތުރުން ކޮންޓްރޯލް ކުރުމުގެ މަސައްކަތް ކުރަމުންދާ ކަމަށެވެ.
އެޗްޕީއޭ އިން އާންމު ކުރި ތަފާސް ހިސާބުތައް ދައްކާ ގޮތުގައި ދެނެގަނެވިފައިވާ ކޮންޓެކްޓުންގެ ގޮތުގައި 177 މީހުން އެބަތިބިއެވެ. އަދި އަލާމާތްތައް ހުރި ކޮންޓެކްޓުންގެ އަދަދު 25 އަށް އަރައެވެ. އަލާމާތް ހުރެގެން ޓެސްޓް ކުރެވުނު އަދަދު 46 އަށް އަރާއިރު ހައި ރިސްކުންގެ ގޮތުގައި ދެ ކޮންޓެކްޓުން އެބަތިބި ކަމަށް އެޗްޕީއޭ އިން ބުންޏެވެ.
އެޗްޕީއޭ އިން ބުނީ މި ބަލިން ރައްކާތެރިވުމަށްދޭ ޕްރޮފައިލެކްސް ވެކްސިން ދީފައި ވަނީ 27 މީހަކަށް ކަމަށެވެ.
މި ބަލި ފެތުރެނީ ނޭލާވާ ނިޒާމުގެ ޒަރިއްޔާއިންނެވެ. ބަލި ޖެހުމުން ފުރަތަމަ ފެންނާނީ އާންމު ރޯގާތަކުގައި ވެސް ފެންނަ އަލާމަތްތަކެވެ. މީގެ އިތުރުން ހަފްތާއެއްހާ ދުވަސް ފަހުން ވަރަށް ބޮޑަށް ކެއްސާ މި ކެއްސުން ދިގުލައިގެން ދެއެވެ. ތުއްތު ކުދިންނަށް މީގެއިތުރުން ވެސް އެހެން އަލާމާތްތައް ފެނިދާނެ އެވެ. އަދި ދި ވެކްސިން ފުރިހަމަ ކޮށްފައިވާ ކުއްޖަކަށް ނުވަތަ ބޮޑު މީހަކަށް މި ބަލި ޖެހިއްޖެނަމަ ބަލީގައި މާބޮޑެތި އަލާމަތްތަކެއް ނުފެނިދާނެއެވެ.
ބަލި ޖެހުުމުން ނުރައްކާ ބޮޑީ ވަރަށް ތުއްތު ކުދީންނަށެވެ. އެހެން ކަމުން ހަތް އަހަތު ނުވާ ކުދީންގެ ތެރެއިން މި ވެކްސިންގެ ޑޯޒްތައް ފުރިހަމަ ނުކޮށް ހުރި ނަމަ ވީހާވެސް އަވަހަކަށް ވެކްސިން ފުރިހަަމަ ކުރަން އެޗްޕީއޭ އިން އިރުޝާދުދެއެވެ.
މީގެއިތުރުން ރޯގާ ޖެހި ކެއްސާ މީހުންގެ ތެރެއިން ކެއްސުން ދިގުލައިގެންދާ ނަމަ، ނުވަތަ ކެއްސުމުގެ ސަބަބުން އިތުރު އުނދަގޫތަކެއް ދިމާވާ ނަމަ، ނުވަތަ ދިގު މުއްދަތަކަށް ފަރުވާ ކުރާ އެހެން ބައްޔެއް ހުރި ނަމަ ތުއްތު ކުއްޖެއް ނުވަތަ މާބަނޑު މީހަކު ނަމަ ލަސްނުކޮށް ސިއްހީ ހިދުމަތްތެރިއެއްގެ ލަފާ ހޯދަން ޖެހެއެވެ.
ޕަޓޫސިސް އަދި އެހެނިހެން އަރިދަފުސް ރޯގާތަކުން ރައްކާތެރިވުމަށް:
- މާސްކް އަޅައިގެން އުޅުން،
- އަލާމާތެއް ހުރިނަމަ ސްކޫލަށް/އޮފީހަށް/މީހުން ގިނަ ތަންތަނަށް ނުދިއުން އަދި ބަލި މީހުން ގާތަށް ނުދިއުން.
- އިންފްލުއެންޒާ އަދި ކޮވިޑް-19 ވެކްސިން ޖެހުން.
- 7 އަހަރުން ދަށުގެ ކުދިންގެ ތެރެއިން ޕަޓޫސިސްގެ ވެކްސިން ފަރިހަމަ ނުކުރާ ކުދިންގެ ވެކްސިން ފުރިހަމަ ކުރުން
- އަތް ދޮވުން ނުވަތަ ސެނިޓައިޒަރ ބޭނުން ކުރުން
