ވިނަރެސް ފްލެޓް ތަކުން 4،200 ރުފިޔާ ކަނޑާލާފައިވާ ކަމަށް ހައުސިންގ ޑިވެލޮޕްމެންޓް ކޯޕަރޭޝަން(އެޗްޑީސީ)އިން ބުނެފި އެވެ.
އެޗްޑީސީ އިން މިއަދު ނެރުނު ބަޔާނެއްގައި ބުނީ ވިނަރެސް މަޝްރޫއު އިން ފްލެޓު ގަތް މީހުންގެ އެދުމުގެ މަތިން ރައީސް މުއިއްޒުގެ "ހަފްތާ 14" މަގު ޗާޓާ އެއްގޮތަށް އެ ކުންފުނިން އިތުރު ލުއިތަކެއް ދިނުމަށް ނިންމާފައިވާ ކަމަށެވެ.
އެގޮތުން، "ލީސް ޓު އޯން މޮޑެލް" ގެ އިންޓަރެސްޓް ރޭޓު %9 އިން %6 އަށް ބަދަލު ކުރުމުގެ އިތުރުން ޑައުންޕޭމަންޓް %50 ކުޑަކުރެވި، ކުޑަކުރެވުނު %50 ފްލެޓު އަގުން އުނިކުރެވިފައިވާ ކަމަށް ވެސް އެޗްޑީސީން ބުންޏެވެ. މިއާއެކު، ޑައުންޕޭމަންޓް ދެއްކުމަށް ދެވިފައިވާ ތިން މަހުގެ ބަދަލުގައި ހަ މަސް ދުވަހުން ޑައުންޕޭމަންޓް ދައްކަން ޖެހޭ ގޮތަށް ވަނީ ހަމަޖައްސައިފައެވެ. އިންޓަރެޓްސް ރޭޓް ކުޑަ ކުރުމުން ދައްކަން ޖެހޭ އަދަދުން އިތުރު 4،200ރ. ކުލިން އުނިވާނެ ކަމަށް އެޗްޑީސީން ބުންޏެވެ.
އެ ބަދަލާ އެކު، ވިނަރެސް ފްލެޓްތަކުގެ ކުލީގެ ގޮތުގައި ދައްކަން ޖެހޭ އަދަދު އުޅޭނީ 9،000ރ. އާއި 13،000ރ. އާ ދެމެދުގައެވެ. މީގެކުރިން ނަމަ، ވިނަރެސް ފްލެޓުތަކުގެ ކުލި އުޅެނީ 16،000ރ. އިން މަތިންނެވެ.
އެޗްޑީސީން ބުނީ ބޭންކު މެދުވެރިކޮށް ނުވަތަ އަމިއްލަ ފައިސާ އިން އެއްފަހަރާ އަގު އަދާކުރާ އުސޫލުން ވިނަރެސް ފްލެޓްތައް ގަނެފައިވާ މީހުންނަށް ވެސް މިއަދު އާންމުކުރި ލުއިތައް ލިބޭނެ ކަމަށެވެ. ބޭންކު ލޯނަށް އެވްރެޖުކޮށް ދައްކަން ޖެހޭ އަދަދުން 4،200ރ. އެވްރެޖުކޮށް ކުޑަކުރާނެ ގޮތަށް ފްލެޓުގެ އަގުން ޑިސްކައުންޓް ދޭނެ ކަމަށް އެޗްޑީސީ އިން ބުންޏެވެ. އަމިއްލަ ފައިސާ އިން އެއްފަހަރާ އަގު އަދާކުރާ މީހުންނަށް ފްލެޓުގެ އަގުން ވެސް އެ ވަރުގެ ޑިސްކައުންޓެއް ދޭނެ ކަމަށް އެޗްޑީސީން އިން ބުންޏެވެ.
