ހައްޖަށް ގެންދިއުމަށް ޓަކައި އެ އަހަރަކަށް ކަނޑައެޅިފައިވާ އުމުރުފުރާއަށް ފެތޭ ފަރާތްތައް ނަގާނީ ފަޤީރުންނާއި މިސްކީނުންގެ ދަފުތަރުން ކަމަށް އުސޫލުގައި ބުނެފި އެވެ.
ދައުލަތުގެ ބެލުމުގެ ދަށުން ހިލޭ ހައްޖަށް ގެންދިއުމުގެ އިންތިޒާމުތައް ހަމަޖެއްސުމުގައި އަމަލުކުރާނެ އުސޫލުތަކާއި ހަމަތަކާއި މިންގަނޑުތައް ބަޔާންކުރާ އުސޫލު އިސްލާމިކް މިނިސްޓްރީން އާންމު ކުރި އުސޫލުގައި ބުނެފައިވަނީ ހައްޖަށް ގެންދާ މީހުން ހޮވުމުގެ ކަންތައްތައް ކުރިޔަށްގެންދާނީ ވުޒާރާގެ ހައްޖު އެންޑް އުމްރާ ކަންކަމުގައި ލަފާދޭ ކޮމިޓީގެ ބެލުމުގެ ދަށުން ކަމަށެވެ.
މި އުސޫލުގެ ދަށުން ހިލޭ ހައްޖަށް ގެންދާ މީހުން ހޮވުމުގައި ބަލާނެ ފަސް ޝަރުތެއް ބަޔާންކޮށްފައިވެ އެވެ. އެ ޝަރުތުތަކަކީ:
- ފަގީރުންނާއި މިސްކީނުންގެ ދަފުތަރުގައި ރަޖިސްޓްރީކޮށްފައިވުން.
- ހައްޖުގެ އަޅުކަން ކުރިން އަދާކޮށްފައި ނުވާ މީހަކަށް ވުން.
- އެ އަހަރަކު އިއުލާންކުރާ އުމުރުފުރާގެ މީހަކަށް ވުން.
- ހައްޖުގެ އަޅުކަން އާދަކުރެވޭނެ ސިއްހީ ހާލެއްގައި ހުރުން.
- އެ އަހަރަކު ހައްޖަށް ގެންދާ މީހުން ހޮވުމުގެ ކުރިން މީލާދީ ގޮތުން 69 އަހަރު ފުރިފައި ނުވާ މީހަކަށް ވުން.
މި އުސޫލުގެ ދަށުން ކޮންމެ މީހަކަށް ދޭނީ އެންމެ ޖާގައެއް ކަމަށް ވެސް ބުންޏެވެ. އެ އުސޫލުގައި ބުނެފައިވަނީ އުސޫލުގެ ދަށުން ހައްޖަށް ދިއުމަށް ފުރުސަތު ލިބޭ ފަރާތްތައް ފޮނުވުމަށް ޓަކައި ހިނގާ ޚަރަދު ހަމަޖައްސާނީ ދައުލަތުގެ ބަޖެޓުން ނުވަތަ ޒަކާތު ފަންޑުން ނުވަތަ ހެޔޮއެދޭ ފަރާތްތަކުން ފޯރުކޮށްދޭ މާލީ އެހީތެރިކަމުގެ ދަށުން ކަމަށެވެ.
ސަރުކާރުން ކުރިން ބުނި ގޮތުގައި، ފުރަތަމަ ތިން އަހަރު، އުމުރުން 50 އަހަރާއި 69 އަހަރާ ދެމެދުގެ މީހުން އަދި ފަހު ދެ އަހަރު 45 އަހަރާއި 69 އަހަރާ ދެމެދުގެ މީހުންނަށް ފުރުސަތު ދޭން ވަނީ ނިންމައިފަ އެވެ.
ދައުލަތުގެ ހަރަދުގައި ހައްޖަށް ގެންދާ މީހުންނަށް އެތެރޭގެ ދަތުރުފަތުރުތަކުގެ ހަރަދާއި މާލޭގައި ހުރުމުގެ ހަރަދު ވެސް ހަމަޖައްސައިދޭނެ އެވެ.
ފަގީރުންގެ ދަފްތަރުގައި މިވަގުތު 6،000 އެއްހާ މީހުން ތިބެ އެވެ.
