ފްލެޓް ލިބުނު ކަމަށް ބުނެ އޮޅުވާލައިގެން ގއ. ވިލިނގިލީ މީހެއް އަތުން ދެ ލައްކަ ރުފިޔާ އަތުލި މައްސަލައެއް ބަލަމުން އަންނަ ކަމަށް ފުލުހުން މިއަދު ބުނެފިއެވެ.
ފުލުހުން ބުނީ، ލާރި އަތުލާފައި ވަނީ އެޗްޑީސީގެ ފްލެޓެއް ލިބުނުކަމަށް ބުނެކަމަށެވެ. އަދި މި މައްސަލަ ފުލުހަށް ހުށަހެޅީ އިއްޔެގެ ވަގުތެއްގައި ކަމަށް ފުލުހުން ބުންޏެވެ.
މި މައްސަލައާ ގުޅިގެން އެއްވެސް މީހެއް އަދި ހައްޔަރު ކޮށްފައެއް ނުވެއެވެ. ނަމަވެސް، އެ މައްސަލަ ފުލުހުން ދަނީ ބަލަމުންނެވެ.
މަކަރާއި ހީލަތުން ފައިސާ ހޯދާ މައްސަލަތަކަށް ސަމާލުވުމަށް އަބަދުވެސް ފުލުހުންނާއި ކަމާގުޅޭ އިދާރާތަކުން އިލްތިމާސް ކުރެއެވެ.
އެގޮތުން ފްލެޓާއި ގޯތި ލިބުނު ކަމަށް ބުނެ އޮޅުވާލައިގެން ފައިސާ ހޯދުމާއި ބޭންކްގެ ނަމުގައި ގުޅާ ފައިސާ ހޯދައި ތަފާތު ލިންކުތައް ބޭނުންކޮށްގެން ފައިސާ ހޯދުމުގެ ގިނަ މައްސަލަތަށް ފުލުހަށް ހުށައަޅަ އެވެ.
