ރާއްޖޭގެ އޭވިއޭޝަންތަކުގައި ތިބި އިންޑިއާގެ އަސްކަރީ ސިފައިން އަނބުރާ ގެނައުމަށްފަހު ރާއްޖޭގެ ވައިގެ އުޅަނދުތައް ދުއްވަން އެގައުމުގެ ހުނަރުވެރި ފަންނީ މީހުން ފޮނުވާނެ ކަމަށް އިންޑިއާއިން ބުނެފި އެވެ.
އިންޑިއާގެ އެކްސްޓާނަލް އެފެއާސް މިނިސްޓްރީގެ ތަރުޖަމާނު ރަންދީރު ޖައިސްވަލް ދެއްވި ނޫސްވެރިންގެ ބައްދަލުވުމެއްގައި ވިދާޅުވީ އެ ފިޔަވަޅަކީ ރާއްޖޭގެ ސަރުކާރުން އެކަމަށް ރަސްމީކޮށް އެދުމުން އެޅި ފިޔަވަޅެއް ކަމަށެވެ.
ރާއްޖޭގައި ތިބި އިންޑިއާގެ އަސްކަރީ ސިފައިން ބޭލުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. އެކަމާއި ގުޅިގެން އިންޑިއާއާއި ރާއްޖެއާއި ދެމެދު މިހާތަނަށް ދެ ބައްދަލުވުމެއް ވަނީ ބާއްވާފަ އެވެ.
ތަރުޖަމާނު ރަންދީރު ޖައިސްވަލް ވިދާޅުވީ ރާއްޖޭގައި ތިބި އިންޑިއާ ސިފައިން ގެންދިއުމާއި ގުޅޭ ތިން ވަނަ ބައްދަލުވުން މިމަހުގެ ފަހުކޮޅު ބާއްވަން ހަމަޖެހިފައިވާ ކަމަށެވެ.
ރާއްޖޭގެ ފޮރިން މިނިސްޓްރީން މީގެ ކުރިން ނެރުނު ބަޔާނުގައިވަނީ، ދެ ގައުމުގެ ސަރުކާރުން މަޝްވަރާކުރުމަށްފަހު އެއްބަސްވީ، އިންޑިއާއިން ރާއްޖެއަށް ހަދިޔާކުރި ތިން ވައިގެ އުޅަނދެއްގެ އޮޕަރޭޝަނަށް ރާއްޖޭގައި ތިބި އިންޑިއާގެ ސިފައިންގެ ތެރެއިން އެއް ބަޔަކު، އަންނަ މަހުގެ 10ވަނަ ދުވަހުގެ އަދި ބާކީ ތިބި ސިފައިން މޭމަހުގެ 10 ވަނަ ދުވަހުގެ ކުރިން ބަދަލުކުރުމަށް ކަމަށެވެ.
މިވަގުތު ރާއްޖޭގައި ގާތްތަނޑަކަށް 70 އިންޑިއާ ސިފައިން ތިބި ކަމަށް އިންޑިއާގެ ނޫސްތަކުގައި ރިޕޯޓު ކޮށްފައި ވެ އެވެ. އަދި އިންޑިއާގެ ޑޯނިއާ 228 މެރިޓައިމް ޕެޓްރޯލް މަތިންދާބޯޓަކާއި އެޗްއޭއެލް ދެ ހެލިކޮޕްޓަރު ރާއްޖޭގައި އެބަ އޮތެވެ.
