ރައީސް ޑރ. މުހައްމަދު މުއިއްޒު، އެ މަނިކުފާނުގެ ރިޔާސީ ކެމްޕޭނުގެ ތެރެއިން ދެއްކެވި ވާހަކަފުޅުތަކާއި ވެވަޑައިގެންނެވި ވައުދުފުޅުތައް ރައީސް އޮފީހުގެ ވެބްސައިޓުން ފެންނާނެ ގޮތް ހަދައިފިއެވެ.
ރައީސް އޮފީހުން ބުނީ ރައީސްގެ ހުރިހާ ވާހަކަފުޅުތަކާއި ވައުދުފުޅުތައް https://presidency.gov.mv/drmuizzu2023/ ވެބްސައިޓުން ފެންނަން ހުންނާނެ ކަމަށެވެ.
ރިޔާސީ އިންތިހާބުގެ ކެމްޕޭނުގައި ރައީސް މުއިއްޒު ވަނީ 53 ދުވަހުގެ ތެރޭގައި، ރާއްޖޭގެ މީހުން ދިރިއުޅޭ 153 ރަށަކަށާއި، ހުރިހާ ސިޓީތަކަށް ވަޑައިގެންފައެވެ. ކެމްޕޭނުގެ ތެރެއިން އެ މަނިކުފާނުގެ ވިސްނުންފުޅާއި ތަސައްވުރާއި ސިޔާސަތު ހާމަކުރައްވައި، 205 ފަހަރު ވާހަކަފުޅު ދައްކަވާފައިވެއެވެ.
ކެމްޕޭނުގައި އެ މަނިކުފާނު ދެއްކެވި ވާހަކަފުޅުތަކާއި ވެވަޑައިގެންނެވި ވައުދުތައް ހިމެނޭ ފޮތެއް ވެސް ރައީސް މުއިއްޒު ވަނީ ތައްޔާރުކޮށް، ލޯންޗުކޮށްދެއްވައިފައެވެ. އެ ފޮތްތައް ޗާޕުކޮށް ނިމުމުން، ރާއްޖޭގެ ހުރިހާ ސްކޫލުތަކަށާއި މިނިސްޓްރީތަކުގެ އިތުރުން ރަށްރަށުގައި ހުންނަ އެހެނިހެން ސަރުކާރު އޮފީސްތަކަށް ބަހާނެ ކަމަށް ރައީސް މުއިއްޒު ވިދާޅުވެފައިވެއެވެ.
