މޯލްޑިވްސް އިންލަންޑް ރެވެނިއު އޮތޯރިޓީ (މީރާ)ގެ ކޮމިޝަނާ ޖެނެރަލް އޮފް ޓެކްސޭޝަންގެ މަގާމަށް ކުރިމަތިލުމަށް ހުޅުވާލައިފި އެވެ.
މި ފުރުސަތު މިހާރު ހުޅުވާލާފައިވީ ނަމަވެސް މިމަގާމަށް ކުރިމަތިލުމަށް އެދި ހުށަހަޅާ ފޯމު ރައީސް އޮފީހުން ބަލައިގަތުމަށް ހަމަޖެހިފައިވަނީ މިމަހުގެ 20 އަދި 21 ވަނަ ދުވަހުގެ ހެނދުނު 8:00 އިން މެންދުރު 12:00 އަށެވެ.
މި މަގާމަށް ކުރިމަތިލުމަށް އެދޭ ފޯމު ރައީސުލްޖުމްހޫރިއްޔާގެ އޮފީހުގެ ރިސެޕްޝަނުން ލިބޭނެ އެވެ. އަދި ރައީސުލްޖުމްހޫރިއްޔާގެ އޮފީހުގެ ވެބްސައިޓް ފޯމު ޑައުންލޯޑް ކުރެވޭނެ ގޮތްވެސް ވަނީ ހަމަޖައްސާފަ އެވެ. ޓެސްކް ކޮމިޝަނަރަކަށް އައްޔަން ކުރައްވާ ބޭފުޅަކީ އިގްތިޞާދީ، މާލީ، ވިޔަފާރި ނުވަތަ ޓެކްސްއާ ގުޅުންހުރި ދާއިރާއަކުން މާސްޓާސް ޑިގްރީ ނުވަތަ އެއާ އެއްފެންވަރެއްގެ ސަނަދެއް ސަރުކާރު ޤަބޫލުކުރާ އިދާރާއަކުން ހާސިލުކޮށްފައިވާ މީހެއް ކަމުގައި ވާންޖެހޭނެއެވެ. ނުވަތަ ސަރުކާރުގެ މާލިއްޔަތާބެހޭ ދާއިރާއެއްގައި މަސައްކަތްކޮށް މަދުވެގެން 10 އަހަރުގެ ތަޖުރިބާ ލިބިފައިވާ މީހެއްކަމުގައި ވާންޖެހޭނެއެވެ.
މީރާގެ ކޮމިޝަނާ ޖެނެރަލް އޮފް ޓެކްސޭޝަންގެ މަގާމު ހުސްވީ އެ މަގާމުގައި އެންމެ ފަހުން ހުންނެވި ފަތުހުﷲ ޖަމީލު އިސްތިއުފާ ދެއްވުމާ ގުޅިގެންނެވެ.
ފަތުހުﷲ ވަނީ ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ތިމަރަފުށި ދާއިރާއަށް ކުރިމަތިލެއްވުމަށް ނިންމަވާފަ އެވެ.
