ރައްޔިތުންގެ މަޖިލީހުގެ އިންތިހާބުގައި ވާދަކުރުމަށް އަދި މިހާތަނަށް ލިބިފައިވަނީ 15 މީހެއްގެ ފޯމު ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.
އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބު ވިދާޅުވީ ރައްޔިތުންގެ މަޖިލީހުގެ އިންތިޚާބަށް ކުރިމަތިލުމަށް އިލެކްޝަންސް ކޮމިޝަނަށް މިއަދާ ހަމައަށް 15 އެޕްލިކޭޝަން ލިބިފައިވާ ކަމަށެވެ. ބުދަ ދުވަހު އެކަނި ވެސް 4 ފޯމު ލިބިފައިވާ ކަމަށް ހަބީބު ވިދާޅުވި އެވެ.
ކުރިއަށް އޮތް މަޖިލިސް އިންތިހާބުގައި 93 ދާއިރާއަށް މެމްބަރުން އިންތިޚާބު ކުރާނެ އެވެ. އީސީން ބުނި ގޮތުގައި މަޖިލިސް އިންތިހާބަށް ކުރިމަތިލުމަށް އެދޭ މީހުންގެ ފޯމު ބަލައިގަންނާނީ ހުކުރު ދުވަސް ފިޔަވައި ކޮންމެ ދުވަހަކު ހެނދުނު 9:00 އިން މެންދުރުފަހު 2:00 އަށެވެ. ހުކުރު ދުވަހު ފޯމު ބަލައިގަންނާނީ މެންދުރުފަހު 2:00 ން ހަވީރު 4:00 އަށެވެ.
ރައްޔިތުންގެ މަޖިލީހުގެ އިންތިހާބު ބޭއްވުމަށް މާޗް 17 ވަނަ ދުވަހަށް ހަމަޖެހިފައިވީ ނަމަވެސް މަޖިލީހުން ބޭނުންވަނީ ރޯދަ މަހުގެ ފަހަށް އިންތިހާބު ފަސްކުރުމަށެވެ. މަޖިލިސް އިންތިހާބު ބާއްވާ ތާރީހް ފަސްކުރުމަށް ނިންމި ނަމަވެސް އިންތިހާބުގައި ވާދަކުރުމަށް ޝައުގުވެރިވާ ފަރާތްތަކަށް ހުޅުވާލާފައިވާ މުއްދަތު އިތުރު ނުކުރާނެ ކަމަށް އީސީ އިން ބުނެ އެވެ.
