ރައްޔިތުންގެ މަޖިލީހުގެ މުވައްޒަފުންނަށް ބޯހިޔާވަހިކަން ފޯރުކޮށްދިނުމަށް ޕްލޭނެއް އެކުލަވާލުމުގެ މަސައްކަތް ކުރައްވަމުން ގެންދަވާ ކަމަށް މަޖިލީހުގެ ރައީސް މުހައްމަދު އަސްލަމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ އިދާރީ މުވައްޒަފުންގެ ހިދުމަތުގެ އަގުވަޒަންކުރުމަށް ބޭއްވި އެވޯޑް ދިނުމުގެ ހަފުލާގައި ވާހަކަދައްކަވަމުން އަސްލަމް ވިދާޅުވީ، މަޖިލިސް އިދާރާގެ މުވައްޒަފުންގެ ހުރި ކަންބޮޑުވުންތަކުގެ ތެރޭގައި އެ އިދާރާގެ މުވައްޒަފުންނަށް، މިހާތަނަށް ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫއުތަކުން އެއްވެސް ކެޓަގަރީއަކަށް ފެތިފައިނުވުމުން ހިމެނޭ ކަމަށެވެ.
އެހެންކަމުން، މަޖިލީހުގެ ރައީސެެއްގެ ހައްސިޔަތުން އެ އިދާރާގެ މުވައްޒަފުންގެ ކަންބޮޑުވުންތަކަށް ހައްލު ގެނެސްދިނުމަށް މަޖިލިސް އިދާރާގެ އިދާރީ މުވައްޒަފުންނަށްވެސް ބޯހިޔާވަހިކަމުގެ ފުރުސަތު ހޯދައިދެވޭނެ މަގުތައް ފަހިކޮށްދިނުމަށް މަސައްކަތް ކުރައްވަމުން ގެންދަވާނެ ކަމަށް އަސްލަމް ވިދާޅުވިއެވެ.
"އަޅުގަނޑު ގަބޫލުކުރާ ކުރާ ގޮތުގައި ސަރުކާރުގެ އިދާރާއަކުން ނޫން، ރައްޔިތުންގެ މަޖިލީހުން މިކަން ކުރިއަށްގެންދާނެ ގޮތެއްގެ ޕްލޭނެއް އެކުލަވާލަންޖެހޭ. އެހެންކަމުން އެ މަސައްކަތް އިރާދަކުރެއްވިއްޔާ ތިބޭފުޅުންގެ މަޝްވަރާގެ މަތިން، މަޖިލީހުގެ އަމީންއާންމުގެ މަޝްވަރާގެ މަތިން ކުރިއަށްގެންދާނެ ވާހަކަ ދަންނަވަން،" މަޖިލިސް ރައީސް އަސްލަމް ވިދާޅުވިއެވެ.
އަސްލަމް އިތުރަށް ވިދާޅުވީ މަޖިލީހުން އެކަން ކުރިއަށް ގެންދާނެ ގޮތުގެ ޕްލޭނެއް އެކުލަވާލަންޖެހޭ ކަމަށެވެ. އަދި އެކަމުގައި މުވައްޒަފުންނާއި އަމީންއާންމުގެ މަޝްވަރާ ހޯއްދަވާނެ ކަމަށްވެސް އަސްލަމް ވިދާޅުވި އެވެ.
