ގެދޮރުވެރިޔާ ސްކީމްގެ ދަށުން ފްލެޓް ލިބޭ މީހުންގެ ލިސްޓެއްކަމަށް ބުނެ ސޯޝަލް މީޑިއާގައި ދައުރުކުރަމުންދަނީ އޭސީސީން ތައްޔާރުކޮށްފައިވާ ލިސްޓެއް ނޫންކަމަށް އެކޮމިޝަނުން ބުނެފި އެވެ.
އޭސީސީން ބުނީ އެ ކޮމިޝަނުގެ ތަހުގީގަށް ހޯދިފައިވާ ހޯދުންތަކުގެ މާއްޗަށް ބިނާކޮށް، ތަހުގީގުގެ ބޭނުމަށް ތައްޔާރު ކުރެވިފައިވާ ލިސްޓެއްގެ މަޢުލޫމާތު މިހާތަނަށް ކޮމިޝަނުން ހިއްސާކޮށްފައިވާނީ، މި މައްސަލަ ރައްދުވާ ކުރީގެ ގެދޮރުވެރިކަމާއި ޕްލޭނިންގ އާއި ބެހޭ ވުޒާރާގެ މަސައްކަތް މިހާރު ކުރަމުންގެންދާ ގެދޮރުވެރިކަމާއި ބެހޭ ވުޒާރާގެ އިތުރުން ކޮމިޝަނުގެ ޤާނޫނުގެ 1-28 ވަނަ މާއްދާއިން ކޮމިޝަނުން ޖަވާބުދާރީވާންޖެހޭ ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމެޓީއާ އެކަނި ކަމަށެވެ.
އަދި، މިމައްސަލައާ ގުޅޭގޮތުން މީޑިއާއަށް މަޢުލޫމާތު ދިނުމަށް ކޮމިޝަނުން ބޭއްވި ނޫސްވެރިންގެ ބައްދަލުވުމުގައި ތަހުގީގުގައި ފާހަގަކުރެވުނު މުހިންމު ކަންކަމުގެ ތަފުސީލު ހިއްސާކޮށްފައިވާނެ ކަަމަށްވެސް ބުނެފައިވެ އެވެ.
އެގޮތުން އެ މައްސަލަ ތަހުގީގު ކުރުމަށް ފަހު، އޭސީސީން ވިދާޅުވެފައި ވަނީ ކުރީ ސަރުކާރުން ދޫކުރި 4000 ފްލެޓް ދީފައިވާ މީހުންގެ ތެރެއިން 60 ޕަސެންޓް މީހުންނަކީ ޝަރުތު ހަމަނުވާ މީހުން ކަމަށެވެ.
"މީގެއިތުރުން، އެއްވެސް ފަރާތަކަށް މިމައްސަލައާ ގުޅޭ މަޢުލޫމާތެއް ނުވަތަ ލިޔުމެއް ކޮމިޝަނުން ނުވަތަ ކޮމިޝަނުގެ މުވައްޒަފެއް ވެސް ހިއްސާކޮށްފައި ނުވާނެ،". އޭސީސީގެ ބަޔާނުގައި ވެއެވެ.
އަދި އާންމު ރައްޔިތުންނާ ގުޅުންހުރި މިފަދަ ހައްސާސީ މައްސަލައެއްގައި، އެ ރައްޔިތުންނަށް ކަމުގެ ހަގީގަތް އޮޅުވާލުމަށް މީސް މީޑިއާގައި ހަގީގަތާއި ހިލާފު ވާހަކަ ފެތުރުމަކީ، ރައްޔިތުންގެ ހިތުގައި ނަފުރަތާއި ރުޅިވެރިކަން އުފެއްދުމަށް ކުރާ ނާތަހުޒީބު، ޒިންމާދާރުކަން ކުޑަ ކަމަކަށްވާތީ، އެކަމާ މެދު އޭސީސީން އިންތިހާއަށް ކަންބޮޑުވާ ކަަަމަށްވެސް އެ މުއައްސަސާއިން ބުނެފައި ވެ އެެވެ.
އަދި ކޮމިޝަނުގެ އެއްވެސް މަސައްކަތަކަށް އެއްވެސް މީހެއްގެ ނުވަތަ ފަރާތެއްގެ އެއްވެސް މިންވަރެއްގެ އެއްވެސް ނުފޫޒެއް ނުފޯރާނެ ކަމުގެ ފުރިހަމަ ޔަގީންކަންވެސް ވަނީ އަރުވާފައެވެ.
