މާލެސަރަހައްދުގައި ހަށި ވިއްކާ 111 މަސާޖް ޕާލަރ ހިންގަމުން ދާކަަމަށް މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އަލީ އިހުސާން ވިދާޅުވެއްޖެއެވެ.
ހޯމް ސެކްޓަރއިން ބޭއްވި ނޫސްވެރިންގެ ބައްދަލުވުމުގައި މިނިސްޓަރ އިހްސާން ވިދާޅުވީ ސެލޫން އާއި މަސާޖް ޕާލަރ ތަކުގެ ނަމުގައި އެތައްތަނެއްގައި ޣައިރު ގާނޫނީ އަމަލުތައް ހިންގަމުން ދާކަމަށް ފާހަގަކުރެވިފައިވާ ކަމަށެވެ. ހަށި ވިއްކުމަށްޓަކައި ރާއްޖެއަށް ޓޫރިސްޓު ވިސާގައި ބޭރު ގައުމުތަކުން މީހުން ރާއްޖެ އެތެރެކޮށް، އެމީހުން ބޭނުންކޮށްގެން ހަށި ވިއްކާކަމަށް އިހްސާން ވިދާޅުވިއެވެ.
އެހެންކަމުން މިފަދަ ޣައިރުގާނޫނީ އަމަލުތައް ހިންގާ ތަންތަނާއި މެދު ފިޔަވަޅު އެޅުމަށްމަސައްކަތް ކުރަމުންދާ ކަމަށް އިހްސާން ވިދާޅުވިއެވެ.
"މި ތަންތަނާ ދޭތެރޭގައި ގާނޫނީ ފިޔަވަޅު އެޅުމަށް އަޅުގަނޑުމެން މި ދަނީ މަސައްކަތް ކުރަމުން،" އިހުސާން ވިދާޅުވިއެވެ.
މިނިސްޓަރު ވިދާޅުވީ، މިހާރު އަމަލުކުރަމުން އަންނަ އުސޫލަކީ ހަށިވިއްކުމުގެ ވިޔަފާރިކުރާ ކަމަށް ތުހުމަތުވާ ތަންތަނުން ހައްޔަރުކުރެވޭ ބިދޭސީން ޑީޕޯޓުކޮށްލުން ކަމަށެވެ.
މިހާރު މި ގެނެވޭ ބަދަލާއި އެކު ރާއްޖެއިން ބޭރު ޣައިރު ގާނޫނީ އަމަލުތަށް ކުރާ މީހުން ވަގުތުން ޑީޕޯޓް ކުރުމަކީ ހޯމް މިނިސްޓްރީގެ ޕޮލިސީކަމަށް އިހްސާން ވަނީ ވިދާޅުވި އެވެ.
