މާލޭގެ އިމާރާތެއްގެ ނުވަ ވަނަ ބުރިން ވެއްޓުނު މީހާ މިއަދު މަރުވެއްޖެއެވެ.
މި ހާދިސާގައި މަރުވެފައި ވަނީ އިންޑިއާގެ އުމުރުން 20 އަހަރުގެ ފިރިހެނެކެވެ. އައިޖީއެމްއެޗްގެ އިމަޖެންސީ ރޫމްގައި ފަރުވާ ދެމުން ދަނިކޮށް އެމީހާ މަރުވީ 1:40 ހާއިރު އެވެ.
ޗާންދަނީ މަގުގައި ހުންނަ އެ އިމާރާތުގެ މަތިން އެމީހާ ވެއްޓުނީ އޭސީ މަރާމާތު ކުރަން ވެގެން ވައި ގޮޅިއަށް އަރާ އުޅެނިކޮށެވެ. ބިން މައްޗަށް ވެއްޓި، އޭނާގެ ހަށިގަނޑުގެ ގިނަ ތަންތަނަށް ގެއްލުން ލިބުނު އިރު، ބޮލަށް ވެސް ބޮޑެތި ޒަހަމްތަކެއް ލިބިފައިވާ ކަމަށްވެއެވެ.
ފުލުހުން ބުނެފައިވަނީ ޗާންދަނީ މަގުގައި ހުރި އިމާރާތެއްގެ މަތިން މީހަކު ވެއްޓިފައިވާ ކަމުގެ މައުލޫމާތު މިއަދު ހެނދުނު 10:30 ހާއިރު ފުލުހުންނަށް ލިބިފައިވާ ކަމަށެވެ. އެ މީހާ ވެއްޓުނީ އިމާރާތުގެ ނުވަވަނަ ފަންގިފިލާގެ ސިޑިގޮޅިން އެންމެ ތިރިއަށް ކަމަށް ފުލުހުން ބުނެއެވެ.
