ރައީސް ޑރ. މުޙައްމަދު މުއިއްޒު މިއަދު ގދ. ގައްދުއަށް ވަޑައިގަތުމުން އެ ރަށުގެ ކައުންސިލުން އެ މަނިކުފާނާ ބައްދަލު ނުކުރެއްވިކަމަށް ރައީސް މިއަދު ވިދާޅުވެއްޖެއެވެ.
ދެކުނުގެ ރަށްތަކަށް ކުރައްވާ ދަތުރުފުޅުގައި ރައީސް މުއިއްޒު ގައްދޫއަށް ވަޑައިގަތީ މިއަދު ހެނދުނުއެވެ. އެރަށަށް ވަޑައިގެން ރައީސް ރައްޔިތުންނާއި ބައްދަލުކުރެއްވުން އޮތީ ގދ އަތޮޅު މަދަރުސާގައެވެ.
ގައްދޫގައި ވާހަކަފުޅުދައްކަވަމުން ރައީސް ވިދާޅުވީ، ސިޔާސީ ފިކުރު ކިތަންމެ ތަފާތު ނަމަވެސް، މިހާތަނަށް ވަޑައިގެންނެވި ހުރިހާ ރަށެއްގެ ކައުންސިލަރުން ބައްދަލުކުރައްވައި، ރަށު ރައްޔިތުންގެ ކަންކަމުގައި މަޝްވަރާ ކުރައްވައިފައިވާ ކަމަށެވެ.
ނަމަވެސް މިއަދު ގައްދޫ ކައުންސިލުގެ ފަރާތުން ފެނުނީ ވަރަށް ހިތާމަކުރަނިވި މަންޒަރެއް ކަމަށް ރައީސް ވިދާޅުވިއެވެ. އަދި އެއީ ލާމަރުކަޒީ ނިޒާމެއް ހިންގަންޖެހޭ އުސޫލެއް ނޫންކަމަށް ވެސް ވިދާޅުވި އެވެ. ރައީސް ވިދާޅުވީ އެމަނިކުފާނު މިހާރު ކުރައްވަމުން ގެންދާ ދަތުރުފުޅުގައި ހުރިހާ ކައުންސިލުންވެސް އެމަނިކުފާނާ ބައްދަލުކުރައްވަމުން ގެންދަވާކަމަށެވެ. އެގޮތުން ސަރުކާރާއި ހިޔާލު ތަފާތު އެމްޑީޕީގެ ކައުންސިލަރުންވެސް ބައްދަލުވުންތަކުގައި ބައިވެރިވިކަން އެމަނިކުފާނު ފާހަގަކުރެއްވިއެވެ.
"އެހެންނަމަވެސް މި ރަށުން މި ފެންނަ މަންޒަރާމެދު ހިތާމަކުރަން. ލާމަރުކަޒީ ނިޒާމެއް ހިންގަންޖެހޭ އުސޫލެއް ނޫން. އެއަށްވުރެ އަޅުގަނޑުމެން ވާންޖެހޭނީ ޒިންމާދާރު ބަޔަކަށް،" ރައީސް ވިދާޅުވިއެވެ.
ގައްދޫ ރައްޔިތުންނާ ރައީސް ބައްދަލު ކުރެއްވުމަށް އޮތް ޖަލްސާގައި ގައްދޫ ކައުންސިލުގެ ރައީސް ވާހަކަ ދައްކަވާ ގޮތަށް އެޖެންޑާ ވެސް ކޮށްފައި އޮތެވެ. ނަމަވެސް އެންމެ ފަހުވަގުތު ކައުންސިލުގެ ރައީސާއި، ނައިބު ރައީސް ވެސް ބައްދަލުވުމަށް ހާޒިރެއް ނުވިއެވެ.
