ސަރުކާރުގެ ފުރަތަމަ 14 ހަފުތާގެ ތެރޭގައި ހިމަނާފައިވާ ބޯހިޔާވަހިކަމުގެ ހުރިހާ ކަމަކަށް ޚާއްޞަކޮށް ތައްޔާރުކޮށްފައިވާ ހިޔާވަހި ޕޯޓަލް މިއަދު ލޯންޗުކޮށްފިއެވެ.
މިއަދު ބޭއްވި ރަސްމިއްޔާތެއްގައި މި ޕޯޓަލް ލޯންޗުކޮށްދެއްވީ އިޖުތިމާއީ އަދި އާއިލީ ތަރައްގީއާ ބެހޭ ވަޒީރު ޑރ. އާއިޝަތު ޝިހާމެވެ.
މި ޕޯޓަލްއާ ގުޅޭ ގޮތުން ހައުސިން މިނިސްޓްރީއިން ނެރުނު ބަޔާނެއްގައި ބުނީ، މި ޕޯޓަލްއަކީ ސަރުކާރުގެ ބޯހިޔާވަހިކަމާ ގުޅުން ހުރި ހުރިހާ ކަމަކަށް އޮންލައިންކޮށް ހުށަހެޅުމަށް ފަރުމާކޮށްފައިވާ ޕޯޓަލްއެއް ކަމަށެވެ.
އެގޮތުން އެ ޕޯޓަލް މެދުވެރިކޮށް ހައުސިން ޕްރޮފައިލް ފުރިހަމަކޮށް، ހައުސިން ސްކީމްތަކައް ހުށަހަޅައި، ބޯހިޔާވަހިކަމުގެ ލޯނުތަކުގެ އިތުރުން ބޯހިޔާވަހިކަމާ ގުޅުން ހުރި ޝަކުވާ ހުށަހެޅޭނެ ކަމަށް އެ މިނިސްޓްރީއިން ބުންޏެވެ.
މި ޕޯޓަލް ބޭނުންކުރެވޭނީ އީފާސް މެދުވެރިކޮށް ހިޔާވަހި ޕޯޓަލްއަށް ލޮގިން ވެގެންނެވެ.
މިނިސްޓްރީން ބުނި ގޮތުގައި އެ ޕޯޓަލްގައި ރަޖިސްޓްރީވެފައިވާ ފަރާތްތަކުން ސްކީމަށް އެދި ހުށަހެޅުމުން، އެ ހުށަހެޅުން ދަރަޖަ ކުރެވޭނެ ކަމުގަ އެވެ. އަދި ރާއްޖޭގައި ބޯހިޔާވަހިކަން ބޭނުންވާ ފަރާތްތައް ދެނެގަތުމާއި، ރަޖިސްޓްރީ ކުރުމުގެ އިތުރުން އެ ފަރާތްތަކުގެ މައުލޫމާތު ރައްކާކޮށްދެނެ ކަމަށް މިނިސްޓްރީން ވަނީ ބުނެފަ އެވެ. އޭގެއިތުރުން ހައުސިން ނީޑް އެސެސްމަންޓް ވެސް އެ ޕޯޓަލް މެދުވެރިކޮށް ކައުންސިލްތަކާ ގުޅިގެން ކުރެވިގެންދާނެ ކަމަށް މިނިސްޓްރީން މައުލޫމާތުދެ އެވެ.
މީގެއިތުރުން މުސްތަގުބަލްގައި ސަރުކާރުން އެކުލަވާލާ ބޯހިޔާވަހިކަމުގެ މަޝްރޫއުތައް އެކުލަވާލުމަށް ބޭނުންވާ މައުލޫމާތު ފޯރުކޮށްދިނުމުގެ މަސައްކަތް ވެސް ކުރަމުންދާނީ ހިޔާވެހި ޕޯޓަލް މެދުވެރިކޮށް ކަމަށް މިނިސްޓްރީން ބުނެފައިވެ އެވެ.
