އިއްލެ، ރޭޕްގެ ވާހަކަތަކެއް ކިޔައިދެނީ

2019 ވަނަ އަހަރުގެ ކާމިޔާބު ފިލްމު "ބަވަތި" ގެ ޑައިރެކްޓަރު އިލިޔާސް ވަހީދު (އިއްލެ)، "މަޒްލޫމް" ކިޔާ ކުރު ފިލްމެއް ގެނަސްދޭން ތައްޔާރުވެއްޖެ އެވެ.
މިފިލްމުގެ ޓީޒާ ނިމިދިޔަ ހަފްތާގައި ވަނީ އާންމު ކޮށްފަ އެވެ. މި ކުރުފިލްމުގައި މުހިންމު ރޯލުތަކުން ފެނިގެން ދާނީ "ބަވަތީ" ބަތަލް އިފްނާޒް އާއި އެފިލްމުގެ ބަތަލާ ނުޒުހަތު ޝުއައިބު އެވެ. މީގެ އިތުރުން އިއްލެގެ ކުރިއަށް އޮތް ފިލްމު "ނީނާ" ގެ ބަތަލް ޝަރަފް އަބްދުﷲ ގެ އިތުރުން އަރަމުން އަންނަ ފިލްމީ ތަރި ވާޝިޔާ މުހައްމަދު (ޝިޔާ) ވެސް މުހިންމު ރޯލުތަކުން ފެންނާނެ އެވެ.
"ހަމައެމްވީ" އާއި ވާހަކަ ދައްކަމުން އިއްލެ ބުނީ "މަޒްލޫމް" އަކީ ރޭޕްގެ ދެ ވާހަކައެއް ކިޔައިދޭ 45 މިނެޓުގެ ކުރު ފިލްމެއް ކަމަށެވެ. އަދި އެފިލްމާއި ގުޅުވައި އިތުރު ތިން ކުރު ފިލްމެއްވެސް އެ ސިލްސިލާގެ ތެރެއިން އުފައްދާނެ ކަމަށް އިއްލެ ބުންޏެވެ.
"މަޒްލޫމް" ގެ ސްކްރީންޕްލޭ ލިޔެ ޑައިރެކްޓު ކުރަނީ އިއްލެ އެވެ. ޕްރޮޑިއުސް ކުރަނީ "ބަވަތި" ޕްރޮޑިއުސްކުރި އައިފިލްމްސްގެ އިތުރުން ކަޒްމިކް އިންޓަނޭޝަނަލް ގުޅިގެންނެވެ.
މި ކުރު ފިލްމުގެ ޓީޒާ އާންމު ކޮށްފައިވާއިރު އޭގެ ސްޓްރީމިން ރައިޓްސް އަށް ޝައުގުވެރިވާ ޕްލެޓްފޯމުތަކަށް އެ ފުރުސަތު މިހާރު ވަނީ ހުޅުވާލައިފަ އެވެ.
"ބަވަތި" އަށްފަހު އައިފިލްމްސްއިން ވަނީ އިތުރު ދެ ޕްރޮޖެކްޓެއްވެސް އިއުލާން ކޮށްފަ އެވެ. އެއީ ފީޗާ ފިލްމު "ނީނާ" އާއި ޑްރާމާ ސީރީޒް "ބިރުވެރި ވާހަކަ" އެވެ. ކޮވިޑްގެ ސަބަބުން "ނީނާ" ރިލީޒްކުރުން މިވަގުތަށް ފަސްކޮށްފައިވާއިރު "ބިރުވެރި ވާހަކަ" ވަރަށް އަވަހަށް ބެލުންތެރިންނަށް ފެންނާނެކަމަށް އޮތީ ބެލެވިފަ އެވެ.
"ބަވަތި" އަކީ އިއްލެގެ ފުރަތަމަ ޑައިރެކްޓަނެވެ. އެފިލްމަކީ 2019 ވަނަ އަހަރުގެ އެންމެ ކާމިޔާބު އެއް ފިލްމުވެސް މެއެވެ. އެފިލްމުގެ މުހިންމު ރޯލުތަކުން ނުޒޫއާއި އިފްނާޒް ފެނިގެން ދިޔަ އެވެ. ކުރިއަށް އޮތް ފިލްމު "ނީނާ" ގައިވެސް ބަތަލާގެ ރޯލުން ފެންނާނީ ނުޒޫ އެވެ. އަދި ބަތަލްގެ ރޯލުން ފެންނާނީ ޝަރަފް އެވެ.