ކޮވިޑް19 އާއެކު އަޅުގަނޑުމެން އުޅެންފެށިތާ އަހަރެއްހާ ދުވަސް ފާއިތުވެގެން ދިޔައީއެވެ.
އަޅުގަނޑުމެންގެ ރާއްޖޭގައިވެސް ހަރުކަށި ފިޔަވަޅުތައް އެޅި ދުވަސް ވަރާއި ލުއިތައް ލިބުނު ދުވަސްވަރުތައްވެސް ހިނގައްޖެއެވެ. އަނެއްކާވެސް މިއައީ އޭގެން ދުވަސްވަރެކޭ ބުނެވިދާނެއެވެ. މާލެ ސަރަހައްދުގައި ހަލުވި ކަމާއެކު ކޮވިޑް ފެތުރެން ފެށުމުން ފިޔަވަޅުތައް ވަރުގަދަ ކުރީ މީގެ އެއްމަސް ދުވަސް ކުރިން މެއި މަހުގެ ތިން ވަނަ ދުވަހުއެވެ. އެޅި ފިޔަވަޅުތަކާއެކު ހަލުވި ކަމާއެކު ފެތުރެން ފެށި ކޮވިޑް ބޮޑުތަނުން މަދުކުރެވިގެން ދިޔައެވެ.
ކޮވިޑް ކޮންޓްރޯލް ކުރަން އޭރު ފިޔަވަޅުތަކުގެ ތެރޭގައި މާލެ ޞަރަޙައްދު (މާލެއާއި، ހުޅުމާލެއާއި، ވިލިނގިއްޔާއި، ތިލަފުށްޓާއި، ގުޅިފަޅު) ގެ ޕާކުތަކާއި، މައިޒާންތަކާއި، ކުޅިވަރުކުޅޭ ތަންތަނާއި، ދުވާ ޓްރެކުތަކާއި، ސްވިމިންގ ޓްރެކްތައް ބަންދުކުރުމާއި މާލެ ސަރަޙައްދު (މާލެއާއި، ހުޅުމާލެއާއި، ވިލިނގިއްޔާއި، ތިލަފުށްޓާއި، ގުޅިފަޅު) ގައި ކުޅިވަރުކުޅުމާއި، ކުޅިވަރުގެ މުބާރާތްތައް ބޭއްވުން ހުއްޓައިލުން ހިމެނެއެވެ.
ސްކޫލްތައް ވެސް ބަންދުކޮށް އޮންލައިންކޮށް ކިޔަވައިދޭން ފަށާ، ސަރުކާރު އޮފީސްތައް ވެސް ބަންދު ކުރިއެވެ.
މިފިޔަވަޅުތަކަށް މިއަދު އަނެއްކާވެސް މިއަދު މިވަނީ ބޮޑެތި ލުއިތަކެއް ލިބިގެން ގޮސްފައެވެ.
ނަމަވެސް އަދިވެސް އަޅުގަނޑުމެން ވިސްނާލަން ޖެހޭ އެތައް ކަމެއް އެބަހުއްޓެވެ. ހާއްސަކޮށް ގިނަ މީހުން އެއްވެ ހިންގާ ހަރަކާތްތައް ވީހާވެސް މަދު ކުރުމާއެކު އެއްތާވާ މީހުންގެ އަދަދު މަދުކުރުމަކީ މުހިންމު ކަމެކެވެ. ވިސްނާލަންޖެހޭ ކަމެކެވެ. މިކަންކަމަށް ވިސްނާނުލައިފިނަމަ އަނެއްކާވެސް އަތްނުފޯރާ ފަށަށް ކަންކަން ހިނގާދާނެ ކަން މީގެ ކުރިންވެސް ވަނީ އެނގި ހާމަވެފައެވެ.
އެހެންކަމުން ސުކޫލް ޗުއްޓީ ނަމަވެސް އަދި ލުއިތައް ލިބި ދަތުރު ކުރަން ފުރުސަތު އޮތަސް ނިމުނު މެއި މަހު ވެސް ކޮވިޑް ބަލީގައި ރާއްޖެއިން އެތައް ބަޔަކު ނިޔާވިއެވެ. އެތައް ބަޔަކު މިބައްޔަށް ޕޮޒިޓިވްވެ ހާލު ބޮޑުވެ ހޮސްޕިޓަލްތަކުގައި ފަރުވާދޭން ޖެހުނެވެ. އެހެންކަމުން ލުއިތައް ލިބުނަސް އަދި އުފަލެއް ނެތެވެ. ނުވަތަ މަޖާ ނަގާ ސަކަރާތް ޖެހޭކަށްވެސް ނެތެވެ. އަދިވެސް އުޅެން މިޖެހެނީ ވަރަށް ބަލައިގެން ވިސްނައިގެންނެވެ. ކޮވިޑް ހުއްޓުވޭނީ ނުވަތަ މަދުކުރެވޭނީ އޭރުންނެވެ.
