ދައުލަތުގެ ލޮޖިކް: ޔާމީން ޖަލަށް ލާން ހުރިހާ ވަގުންގެ އެހީ ބޭނުން

ރާއްޖޭގެ ތާރީހުގައިވެސް މިހާތަނަށް ހިންގި އެންމެ ބޮޑު ހިޔާނާތް ހިންގާފައިވަނީ 2013 ވަނަ އަހަރާއި 2015 ވަނަ އަހަރާއި ދެމެދު އެވެ. ސަރުކާރު ހިއްސާވާ ކުންފުނި، އެމްއެމްޕީއާރުސީ މެދުވެރިކޮށް ހިންގި އެ ހިޔާނާތަކީ އެއްވެސް މީހަކަށް މިހާރު ސިއްރުވެފައި އޮތްކަމެއް ނޫނެވެ. އެކަން ހިނގައިދިޔަ ގޮތާއި އޭގެން މަންފާ ލިބުނު ފަރާތްތައްވެސް ގިނަ މީހުންނަށް މިހާރު އިނގެ އެވެ.
ކޮންމެއަކަސް މިދެންނެވި ބޮޑު ހިޔާނާތުގައި މޭސްތިރިއެއްގެ ގޮތުގައި ހުންނެވި ކުރީގެ ނައިބު ރައީސް އަހުމަދު އަދީބަށް ވަނީ ދައުލަތުން ދައުވާތަކެއް ކޮށް، އެ ދައުވާތައް ސާބިތުވެ ޖަލުގެ ހުކުމެއްވެސް އިއްވައިފަ އެވެ. އަދި އެމްއެމްޕީއާރުސީގެ އޭރުގެ އެމްޑީއަށްވެސް ވަނީ ހުކުމް އިއްވައިފަ އެވެ. އޭރު ރައީސުލްޖުމްހޫރިއްޔާގެ މަގާމުގައި ހުންނެވި އަބްދުﷲ ޔާމީންގެ މައްޗަށްވެސް ދައުވާތަކެއް އުފުލައި ހުކުމްވެސް ވަނީ ކޮށްފަ އެވެ.
ރައީސް ޔާމީންގެ މައްޗަށް އިއްވި ޖަލު ހުކުމް އިސްތިއުނާފު ކުރުމުގެ މަރުހަލާ މިހާރު ސުޕްރީމް ކޯޓުގައި ކުރިއަށް ގެންދާއިރު ޝަރީއަތުގެ އަޑުއެހުންތަކުން މިވަނީ އެއް ކަމެއް ހާމަވެގެން ގޮސްފަ އެވެ. ރައީސް ޔާމީނަކީ އެމްއެމްޕީއާރުސީ ހިޔާނާތުގެ ފައިސާއިން މަންފާ ލިބުނު މީހުންގެ ތެރެއިން، "އަދީބުގެ އަތްޕުޅުން" ފައިސާ ލިބިލެއްވި ފަރާތެއް ކަމެވެ. ޝައްކެއްވެސް ނެތް ގޮތުގައި 2013 ވަނަ އަހަރާއި 2015 ވަނަ އަހަރާއި ދެމެދު އަދީބު ވަނީ އެކި ފަރާތްތަކަށް ބޮޑެތި އަދަދުތަކުން ފައިސާ ދީފަ އެވެ. އޭގެ ތެރެއިން ގިނަ މީހުންނަށް އެ ފައިސާ އައީ ކިހިނެއްކަން، އަދި އެއީ ދައުލަތުގެ ފައިސާކަން ނުވެސް އިނގެ އެވެ. ރައީސް ޔާމީނަށް ފައިސާ ލިބިލެއްވިއިރުވެސް ކަން ހިނގީ މިފަދައިންނޭ ދެންނެވުމުގެ ޖާގަ އެބަ އޮތެވެ.
އެމްއެމްޕީއާރުސީ ހިޔާނާތުގައި ކަން ހިނގި ގޮތަށް ބަލާއިރު މިހާރުގެ ސަރުކާރުގެ ބައެއް ވަޒީރުންނާއި، އެހެނިހެންވެސް އިސް މަގާމުތަކުގައި ތިއްބެވި ފަރާތްތަކަށް އެފައިސާ ލިބިލައްވާފައި އެބަ ހުއްޓެވެ. ގިނަ ބޭފުޅުން ވަޑައިގެންނެވީ "ޑޮލަރު މާރު" ކުރާށެވެ. މިހާރުގެ ޕީޖީ ހުސައިން ޝަމީމަށް ލިބިލެއްވީ އަދީބާއި ޒިޔަތުގެ ވަކީލުކަން ކުރެއްވުމުން އޭގެ އުޖޫރަ އެވެ. އެކަމަކު އެވެސް ހިޔާނާތުގެ ފައިސާއަށްވުން ވަރަށް ގާތެވެ. މިހެން ގޮސް ވަގު ފައިސާ ރައީސް އިބްރާހިމް މުހައްމަދު ސޯލިހުގެ ޖީބަށް ވެންނެވިކަމުގެ ވާހަކަތަކެއްވެސް މިވަނީ ފެންމަތިވެފަ އެވެ.
ހިޔާނާތުގެ ފައިސާ ދައުރު ކޮށްފައިވަނީ އެސްއޯއެފް ކިޔާ ކުންފުންޏެއް މެދުވެރިކޮށެވެ. ފައިސާ ދޮންނަމުން ދިޔައީ އެކުންފުނިންނެވެ. ކުންފުނީގެ ވެރިން މިހާރު ތިއްބެވީ އިނގިރޭސިވިލާތުގަ އެވެ. ކުންފުނީގެ ވެރިންނަށް ކަން ހިނގާ ދިޔަ ގޮތާއި އެއީ ކޮން ކަހަލަ ފައިސާއެއްކަންވެސް އެނގެ އެވެ. ހިޔާނާތުގެ ފައިސާ ބެހުމުގައި "ޓޫލް" އެއްގެ ގޮތުގައި އެސްއޯއެފް ބޭނުންކުރި ނަމަވެސް އަދީބާއި ޒިޔަތު ކުށްވެރިވާ މިންވަރަށް އެސްއޯއެފްގެ ވެރިންވެސް ކުށްވެރިވެ އެވެ. މި ހަމަ އިންސާނީ ބުއްދިން ގަބޫލުކުރާކަށް މާ އުނދަގުލެއްވެސް ނޫނެވެ.
އެހެންނަމަވެސް ރައީސް ސޯލިހުގެ ސަރުކާރަށް މި ހަމަ ގަބޫލެއް ނުކުރެވެ އެވެ. ޕީޖީ އޮފީހުން ބުނަނީ އެސްއޯއެފްގެ އެއްބާރުލުން ބޭނުންވާތީ އެކުންފުނީގެ ވެރިންނަށް ދައުވާ ނުކުރަން ނިންމާފައިވާ ކަމަށެވެ. ކުރު ގޮތަކަށް ދަންނަވާނަމަ ވަގު ފައިސާ ބެހި މީހުން ކުށްވެރި ނުކޮށް އެމީހުންގެ އެހީގައި، ފައިސާ ލިބުނު ހުރިހާ އެންމެން ކުށްވެރިކުރަން ދައުލަތުން މިވަނީ މަސައްކަތް ފަށައިފަ އެވެ. މިއީ ޕީޖީ ހުސައިން ޝަމީމް ވިދާޅުވާ ގޮތުގައި "އުންސުރު ހަމަވާ އިންސާފް" އެވެ.
ސުޕްރީމް ކޯޓުގެ އަޑުއެހުންތަކަށްފަހު އިއްޔެ ފެނުނު ވަރަށް "މަޖާ" ފޭސްބުކް ސްޓޭޓަސް އެކެވެ. ލިޔެފައިވަނީ "ވަޒީފާއިން ވަކިވެ ވައްކަން ކުރާ ކުންފުންޏެއް ހަދަން ނިންމައިފީމެވެ" މިހެންނެވެ. މަޖާޒީ މާނައެއްގައި ލިޔެފައިވާ މި ސްޓޭޓަސްގައި ބުނެދޭން މި އުޅެނީ ވަރަށްވެސް މުހިންމު ވާހަކައެކެވެ. ދައުލަތުގެ ފައިސާ މިލިއަނުން ވަގަށް ނަގައިގެންވެސް އެސްއޯއެފް ކުށްވެރިނުވާއިރު ކުރިއަށް އޮތްތަނުގައި އެ ބޭނުމަށް ކުންފުންޏެއް ހަދައި އެފަދައިން ކަން ކުރިއަސް ކުށްވެރިވެގެން ނުވާނެތާ އެވެ. އެސްއޯއެފްގެ ވެރިންނާއި އާއިލާތަށް ދިރިއުޅެނީ ތަނަވަސްކަމުގައި ރާއްޖެއިން ބޭރުގަ އެވެ. އެހެންވީމާ މި ބޭނުމަށް ހަދާ އެހެން ކުންފުނީގެ ވެރިންނަށްވެސް މި މުސްތަގުބަލު އެބަ އޮތްތާ އެވެ.
އެއްގޮތަކަށްވެސް ވައްކަން ކުރަން ހިތްވަރު ދެނީއެއް ނޫނެވެ. އަދި އެއީ ރަނގަޅު ކަމެއްކަމަށް ލޭބަލްކުރަން އުޅެނީއެއްވެސް ނޫނެވެ. އެކަމަކު ދައުލަތުން ކަން ކުރަމުން އަންނަ ގޮތުން އިންސާފަކީ "ވައްކަން އޯކޭ" ކޮށްލުން ކަމަށް ވާތީ އެކަން ފާހަގަކުރަނީ އެވެ.
މިހުރިހާ ވާހަކައެއް އެންމެ ޕެރެގްރާފަކަށް ކުރުކޮށްލާނަމަ ބުނެވޭނީ ދައުލަތުގެ ޓާގެޓަކީ ހަމަ އެންމެ މީހެކެވެ. އެއީ ރައީސް ޔާމީނެވެ. އެސްއޯއެފް އާއި، އަދީބާއި، ޒިޔަތާއި ދެންވެސް ތިބިއްޔާ ތިބި މީހެއްގެ އެހީ ހޯދައިގެން ދައުލަތުން ބޭނުންވަނީ ރައީސް ޔާމީން ޖަލަށް ލާށެވެ. އެމަނިކުފާނަށް 10 އަހަރުން 20 އަހަރުން ހުކުމް ކުރާށެވެ. މިއީ ރައީސް ސޯލިހު ވައުދުވެ ވަޑައިގެންނެވި އިންސާފުކަމުގައި ވެދާނެ އެވެ.