މިހިނގާ 2021 ވަނަ އަހަރު ނިމޭއިރު ރާއްޖޭގެ އިގްތިސޯދު ކޮވިޑް-19 ގެ ކުރިން އޮތް ހާލަތަށް ރުޖޫއަ ވާނެ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
އަމީރު މިފަދައިން ވިދާޅުވީ ކުދި ވިޔަފާރިތަކަށް ސްޓިމިއުލަސް ލޯނު ޕެކޭޖްތަކެއް ތައާރަފުކުރުމުގެ ގޮތުން ވާހަކަފުޅު ދައްކަވަމުންނެވެ. އަމީރު ވިދާޅުވީ ކޮވިޑް-19 ގެ ސަބަބުން ކުދި ވިޔަފާރިތަކަށް ދިމާވެފައިވާ ދަތިތައް ހައްލު ކުރުމުގެ ގޮތުން ލޯނުތަކެއް ސަރުކާރުން ތައާރަފު ކުރަނީ 2019 ވަނަ އަހަރު ރާއްޖޭގެ އިގްތިސޯދު އޮތް ހާލަތަށް އަނބުރާ ރުޖޫއަ ކުރުމަށް ކަމަށެވެ.
ރާއްޖޭގެ އިގްތިސޯދީ ދުވެލި މިހާރު ހުރި މިންވަރަށް ރިއާޔަތް ކުރައްވައި އަމީރު ވިދާޅުވީ މިއަހަރު ނިމޭއިރު 18 އިންސައްތައިގެ ކުރިއެރުމެއް އަންނާނެ ކަމަށެވެ. އެގޮތުން ސަރުކާރުން އަމާޒު ހިފާފައިވަނީ ކޮވިޑުގެ ބަލިމަޑުކަން ރާއްޖެއަށް އައުމުގެ ކުރިން އިގްތިސޯދު އޮތް ހާލަތަށް ރުޖޫއަވުމަށް ކަމަށް އަމީރު ވިދާޅުވި އެވެ.
ކޮވިޑުގެ ސަބަބުން ރާއްޖޭގެ އެންމެ ބޮޑު އިގްތިސޯދީ ސިނާއަތް، ފަތުރުވެރިކަމުގެ ސިނާއަތް ވަނީ ވަރަށް ބޮޑަށް ދަށަށް ގޮސްފަ އެވެ. އެގޮތުން ފަތުރުވެރިން އަންނަ އަދަދު ދަށަށް ދިޔުމުގެ ސަބަބުން ގިނަ ބައެއްގެ އާމްދަނީއަށްވެސް އޭގެ އަސަރު ކުރި އެވެ.
މީގެ އިތުރުން މުޅި ރާއްޖޭގެ، ހާއްސަކޮށް މާލޭގެ ފިހާރަތަކާއި، ރެސްޓޯރެންޓު އަދި ކެފޭތަކަށް ކޮވިޑުގެ ސަބަބުން ނޭދެވޭ އަސަރުތަކެއް ކުރި އެވެ. ކޮވިޑުގެ ތިން ރާޅެއް ރާއްޖެއަށް ނަގައި ހަތަރުވަނަ ރާޅާއެކު އެޅި ފިޔަވަޅުތަކުގެ ސަބަބުން މާލޭގެ ކެފޭ ރެސްޓޯރެންޓުތައް ބަންދު ކުރަން ޖެހުނުކަންވެސް ފާހަގަކޮށްލެވެ އެވެ.
ކޮވިޑާއިރުއެކު ރާއްޖެ އިގްތިސޯދު ގާތްގަނޑަކަށް 34 އިންސައްތަ ދަށަށް ދިޔަ އެވެ. ލިބޭނެ ކަމަށް ލަފާކުރި މިންވަރަށް އާމްދަނީ ނުލިބި ޑޮލަރުގެ ދަތިކަންވެސް ރާއްޖެއަށް ކުރިމަތިވި އެވެ.
