ސައުތު އިންޑިއާގެ ގިނަ ހިންދީ ރީމޭކުތަކެއް މީގެ ކުރިން ކުޅެމުން އައި ބޮލީވުޑް އެކްޓަރު ސަލްމާން ހާން، އިތުރު ރީމޭކެއް ދެން ނުކުޅޭނެ ކަމަށް އޭނާ އަންގައިފި އެވެ.
ސަލްމާން މިގޮތަށް އަންގާފައި މިވަނީ މިއަހަރު ނިކުތް ސައުތުގެ ކާމިޔާބު ފިލްމު "މާސްޓާ" ގެ ރީމޭކެއް ކުޅެން އޭނާ އެއްބަސްވެފައިވަނިކޮށެވެ. ވިޖޭ އަދި ވިޖޭ ސޭތުޕަތީ ލީޑް ރޯލުން ފެނިގެންދިޔަ އެ ފިލްމުގެ ސްކްރިޕްޓު ސަލްމާންއަށް ދީފައި ވަނިކޮށް ފިލްމުގެ ޓީމާއި ބައްދަލުކޮށް ސަލްމާން ބުނީ އިތުރު ރީމޭކެއް ކުޅުމުގެ ވިސްނުން ނެތް ކަމަށެވެ. އެހެންނަމަވެސް "މާސްޓާ" ގައި ވިޖޭގެ ކެރެކްޓާ ވަރަށް ކަމުދާ ކަމަށާއި އެ ކެރެކްޓާއަށް ބިނާކޮށް އެހެން ވާހަކައެއް ލިޔުމަށް ސަލްމާން ވަނީ އެދިފަ އެވެ.
"މާސްޓާ" ގައި ވިޖޭ ކުޅެފައިވާ ޖޭޑީގެ ރޯލަކީ އަބަދު މަސްތުގެ ހާލަތުގައި ހުންނަ ޕްރޮފެސަރެކެވެ. ސަލްމާން މިހާތަނަށް އެފަދަ ރޯލެއް ކުޅެފައި ނުވާއިރު އޭނާ އެރޯލު އަދާކުރަން ބޭނުންވާކަމަށް ވަނީ ބުނެފަ އެވެ.
ފިލްމުގެ ޓީމުން މިހާރު ދަނީ އާ ސްޓޯރީ ލައިން އަކަށް މަސައްކަތް ކުރަމުން ކަމަށާއި ވަރަށް އަވަހަށް ސްޓޯރީލައިން ނިންމައި ސަލްމާންއަށް ހުށަހަޅާނެ ކަމަށް ރިޕޯޓުތައް ބުނެ އެވެ. ތަމިލް ފިލްމު "މާސްޓާ" ޑައިރެކްޓު ކުރީ ލޯކޭޝް ކަނަގަރާޖް އެވެ.
ސަލްމާން މީގެ ކުރިން ވަނީ ސައުތުގެ ގިނަ ރީމޭކުތަކެއް ކުޅެފަ އެވެ. އެގޮތުން ސަލްމާންގެ ފިލްމު "ވޯންޓެޑް" އަކީ ތެލެގޫ ފިލްމު "ޕޯކިރީ" ގެ ރީމޭކެކެވެ. 2003 ވަނަ އަހަރު ނިކުތް "ތޭރޭ ނާމް" އަކީ ތަމިލް ފިލްމު "ސޭތޫ" ގެ ރީމޭކެކެވެ. މީގެ އިތުރުން ތަމިލް ފިލްމު "ކާވަލާން" ގެ ހިންދީ ރީމޭކް "ބޮޑީގާޑު" ގައިވެސް އުޅުނީ ސަލްމާން އެވެ. ސަލްމާންގެ ފިލްމު "ރެޑީ"، "ކިޔޫ ކީ"، "ހަމް ތުމްހާރޭހޭ ސަނަމް"، "ކިކް"، "ނޯ އެންޓްރީ"، "ޖުޑްވާ"، އަދި "ބީވީ ނަމްބަރު 1" އަކީވެސް ރީމޭކް އެވެ.
