ބޮލީވުޑްގެ އެންމެ ނުފޫޒުގަދަ އެއް ޕްރޮޑިއުސަރު އަދި ޑައިރެކްޓަރު ކަރަން ޖޯހަރު އޭނާގެ ބައްޕަ ޔަޝް ޖޯހަރުގެ ނަމުގައި ފައުންޑޭޝަނެއް އުފައްދައިފި އެވެ.
ޔަޝް ޖޯހަރް ފައުންޑޭޝަންގެ ނަމުގައި އުފެއްދި މި ފައުންޑޭޝަނުން މަސައްކަތް ކުރާނީ އިންޑިއާގެ ފިލްމު އިންޑަސްޓްރީ ތަރައްގީ ކުރުމަށެވެ. ކަރަން ބުނީ މިވަގުތަށް އެންމެ ބޮޑު އިސްކަމެއް ދޭނީ ކޮވިޑް-19 ގެ ސަބަބުން އެކި ގޮތްގޮތުން ގެއްލުންވެފައިވާ ބޮލީވުޑްގެ ފަަންނާނުންނަށް އެހީވުމަށް ކަމަށެވެ.
މީގެ އިތުރުން އެކި ޕްރޮޑަކްޝަން ހައުސްތަކަށް ދިމާވެފައިވާ ދަތިތައް ހައްލު ކުރުމުގައި ފައުންޑޭޝަނުން އެހީތެރިކަން ފޯރުކޮށްދޭނެ ކަމަށް ކަރަން ވަނީ ބުނެފަ އެވެ. އަދި ވަސީލަތުގެ ދަތިކަން ދިމާވެފައިވާ ފަރާތްތަކަށްވެސް ވަސީލަތް ފޯރުކޮށް ދިނުމުގައި އެހީވާނެ ކަމަށް ކަރަން ބުންޏެވެ.
1976 ވަނަ އަހަރު ދަރްމާ ޕްރޮޑަކްޝަންގެ ނަމުގައި ކުންފުންޏެއް ހަދައި އޭގެ ދަށުން ފިލްމު އުފައްދަން ފެށި ޔަޝް ޖޯހަރް އަކީ އިންޑިއާގެ ފިލްމު އިންޑަސްޓްރީއަށް ގިނަ ހިދުމަތްތަކެއް ކޮށްދިން ފަރާތެކެވެ. އޭނާ މަރުވީ 2004 ވަނަ އަހަރު އެވެ.
ޔަޝް މަރުވުމަށްފަހު ކަރަން ވަނީ ދަރްމާ ޕްރޮޑަކްޝަންގެ މަސައްކަތްތަކާއި ހަވާލުވެފަ އެވެ. އޭގެ ފަހުން މިއަދާ ހަމައަށްވެސް ދަރްމާ ހިންގަނީ އޭނަ އެވެ. ދަރްމާއަކީ މިވަގުތު ބޮލީވުޑްގައި އޮތް އެންމެ ވަރުގަދަ ފިލްމު ކުންފުންޏެވެ.
