ސައުތުގެ ސުޕަސްޓާ ވިޖޭ ސޭތުޕަތީ އާއިއެކު ބަތަލާ ކެޓްރީނާ ކެއިފް ފެނިގެންދާ ފިލްމަށް ތައްޔާރުވާން ފަށައިފި އެވެ.
މީޑިއާ ރިޕޯޓުތައް ބުނާ ގޮތުން ސްރީރާމް ރާގަވަން ޑައިރެކްޓު ކުރާ އެ ފިލްމުގެ ސްކްރިޕްޓް ރީޑިންގެ މަސައްކަތް ކެޓްރީނާ މިހާރު ވަނީ ފަށައިފަ އެވެ.
މިފިލްމުގައި ކެޓްރީނާ އަދާކުރާނެ ރޯލުގެ މާބޮޑު ތަފްސީލެއް މީޑިއާގައި ހާމަ ނުކުރިނަމަވެސް ކެރެކްޓާއަށް އޭނާ ވަރަށް ބޮޑަށް ތައްޔާރުވާން ޖެހޭކަމަށް ވަނީ ބުނެފަ އެވެ.
މިހާތަނަށް ނަމެއް ދީފައި ނުވާ ފިލްމުގެ ޝޫޓިން ފަށާނީ ކެޓްރީނާ މިހާރު ޝޫޓިން ފަށަން ތައްޔާރުވަމުން ދާ "ޓައިގާ 3" ގެ މަސައްކަތްތައް ނިންމައިލުމަށްފަހު އެވެ.
ވިޖޭ އާއި ކެޓްރީނާ ލީޑްރޯލުން ފެންނާނެ މި ފިލްމުގެ ދިގުމިނަކީ 90 މިނެޓެވެ. އަދި ފިލްމު ޝޫޓުކުރަން ނިންމާފައިވަނީ މެދުކެނޑުމެއްނެތި 30 ދުވަހުގެ ތެރޭގަ އެވެ.
ސްރީރާމްގެ ފިލްމާއި "ޓައިގާ 3" ގެ އިތުރުން ކެޓްރީނާގެ އިތުރު ދެ ފިލްމެއްގެ ޝޫޓިން ވަނީ މުޅިން ނިންމާލައިފަ އެވެ. އެއީ ރޯހިތު ޝެއްޓީ ޑައިރެކްޓު ކުރާ "ސޫރްޔަވަންޝީ" ގެ އިތުރުން އިޝާން ކައްޓަރް އާއިއެކު ކެޓްރީނާ ފެންނަ "ފޯން ބޫތު" އެވެ.
