ހިޔާ ފްލެޓުތަކުގެ ކުލި މިހާރު ހުރި މިންވަރު ބޮޑު ކަމަށާއި އެކަމަށް ހައްލެއް ހޯދަން ޖެހޭކަމަށް ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަދި އެމްޑީޕީގެ ޕީޖީ ލީޑަރު އަލީ އާޒިމް ވިދާޅުވެއްޖެ އެވެ.
ހިޔާ ފްލެޓުތަކުގެ ކުލީގެ ގޮތުގައި ކުރީ ސަރުކާރުން ކަނޑައެޅީ 5،600 ރުފިޔާ އެވެ. އެހެންނަމަވެސް އެތަނުގެ ނުނިމި ހުރި މަސައްކަތްތައް ނިންމުމަށްކަމަށްބުނެ ރައީސް އިބްރާހިމް މުހައްމަދު ސޯލިހުގެ ސަރުކާރުން ދެ އަހަރަށްވުރެއް ގިނަ ދުވަސް ހޭދަކުރުމަށްފަހު، ސަރުކާރުން ބުނެފައިވަނީ އެއަގުގައި ފްލެޓުތައް ދެވެން ނެތްކަމަށެވެ. އެހެންކަމުން ކުލީގެ ގޮތުގައި 8،500 ރުފިޔާ ނަގަން ވަނީ ނިންމައިފަ އެވެ. އެއީ މެއިންޓެނެންސް ފީގެ ގޮތުގައި 1،000 ރުފިޔާ އިތުރު ކުރުމަށްފަހު އެވެ.
މިކަމަށް އެޑްރެސްކުރައްވައި އަލީ އާޒިމް މިއަދު ވިދާޅުވީ ހިޔާ ފްލެޓުތަކަކީ ސޯޝަލް ހައުސިންއަށް އަމާޒުކޮށްގެން ބިނާކުރެވިފައިވާ ތަންތަން ކަމަށެވެ. އެތަނަށް ވަންނަ ފަރާތްތަކުގެ އާމްދަނީއަކީ 5،000 ރުފިޔާ ކަމަށާއި ކުލީގެ ގޮތުގައި 8،500 ރުފިޔާ ނުދެއްކޭނެ ކަމަށްވެސް އޭނާ ވިދާޅުވި އެވެ.
"މިކަމަށް ހައްލެއް ހޯދެންޖެހޭ. ނޫންނަމަ ގަވާއިދުން ކުލި ދައްކާ ފަރާތްތައް މަދުވާނެ"
- އަލީ އާޒިމް
އާޒިމް މިފަދައިން ވިދާޅުވިއިރު މާލެ ސިޓީ ކައުންސިލުން ވަނީ ހިޔާ ފްލެޓުތަކުގެ އަގު އެންމެ ބޮޑުވެގެން 7،000 ރުފިޔާއަށް ކުޑަކުރުމަށް ހުށަހަޅައިފަ އެވެ. މިކަމާއި ގުޅޭ މަޝްވަރާތައް ސިޓީ ކައުންސިލާއި، އެޗްޑީސީގެ އިތުރުން ހައުސިންގް މިނިސްޓްރީ ހިމެނޭ ގޮތަށް ކުރިއަށް ގެންދިޔަ އެވެ.
އެ މަޝްވަރާތަކަށްފަހުވެސް ރައީސް ސޯލިހު ވިދާޅުވީ ކުލި މިހާރު ހުރިވަރަށްވުރެއް ކުޑަކުރާނަމަ ދައުލަތަށް ބުރަ ބޮޑުވާނެ ކަމަށެވެ.
ހިޔާ ފްލެޓުތަކުގެ އެއްބަސްވުންތަކުގައި ސޮއިކޮށް ތަޅުދަނޑި ހަވާލު ކުރުމުގެ މަސައްކަތް މިހާރު ކުރިއަށް ދާއިރު ފްލެޓުވެރިންނަށް އެތަންތަން ހަވާލު ކުރަނީ ފިނިޝިން މަސައްކަތްވެސް ނުނިންމަ އެވެ. ކުލި ދައްކަން ފަށަން ޖެހެނީ ތަނަށް ވަދެވޭތާ ތިން މަސް ފަހުންނެވެ.
މި ދުވަސްވަރަކީ ކޮވިޑް-19 ގެ ސަބަބުން އެތައް ބައެއްގެ އާމްދަނީއަށް އަސަރުކޮށްފައިވާ ދުވަސްވަރެއްކަމުން ފިނިޝިން މަސައްކަތަށް ބޮޑު ހޭދައެއް ކުރުމަށްފަހު ކުލީގެ ގޮތުގައި ބޮޑު އަދަދެއް ދެއްކުމަށް އުނދަގޫވާނެ ކަމަށްބުނެ ގިނަ ބަޔަކު އަންނަނީ ކަންބޮޑުވުން ފާޅު ކުރަމުންނެވެ.
