ދިވެހިރާއްޖެ މިނިވަންވުމަށްފަހު އެންމެ މުހިންމު ހާރިޖީ ސިޔާސަތެއްގެ ގޮތުގައި ދަމަހައްޓަމުން އައިސްފައިވަނީ މިނިވަންކަމާއި ސުލްހަވެރިކަމާއި ހަމަޖެހުން ގާއިމްކޮށް ދެމެހެއްޓުން ކަމަށާއި މިއަދުވެސް ސަރުކާރުން ކުރަމުންދަނީ އެ މަސައްކަތް ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ފޮރިން މިނިސްޓްރީގެ އިމާރާތް މަރާމާތު ކުރުމަށްފަހު އެތަނުގެ ނަން "ފަތުހުﷲ ޖަމީލު ބިލްޑިންގް" އަށް ބަދަލުކޮށް ހުޅުވުމަށް މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން ވަނީ އިމާރާތް ހާއްސަ ކުރެވޭ މަރުހޫމް އަލް އުސްތާޒު ފަތުހުﷲ ޖަމީލުގެ ހިދުމަތްތައް ފާހަގަކުރައްވައިފަ އެވެ. އެގޮތުން އެމަނިކުފާނުގެ ހާރިޖިއްޔާގެ ދުވަސްވަރު ބައިނަލްއަގުވާމީ ދުނިޔޭގައި ވަކާލާތު ކުރައްވަމުން ގެންދެވީ މިނިވަންކަމާއި ސުލްހަވެރިކަން ގާއިމްކޮށް ދެމެހެއްޓުމަށްކަމަށް ރައީސް ވިދާޅުވި އެވެ.
"މިއަދު ބައިނަލްއަގުވާމީ މައިދާނުގައި ރާއްޖެއަށް ލިބިފައިވާ މަތިވެރި މަގާމާއި ރާއްޖެއާމެދު އުފެދިފައިވާ އިތުބާރާ ގަދަރުގެ ހަގީގީ ސިއްރަކީ ހިކުމަތްތެރިކަމާއިއެކު އެމަނިކުފާނު (ފަތުހުﷲ ޖަމީލު) ކުރެއްވި ބުރަ މަސައްކަތް"
- ރައީސް އިބްރާހިމް މުހައްމަދު ސޯލިހު
ރައީސް ވިދާޅުވީ މިއަދުވެސް ސަރުކާރުން ދަމަހައްޓަމުން އަންނަނީ ހަމަ އެ ސިޔާސަތު ކަމަށެވެ. ރާއްޖެއިން އަބަދުވެސް ވަކާލާތު ކުރާނީ ކޮންމެ ގައުމެއްގެވެސް މިިނިވަންކަމާއި ސިޔާދަތު ދެމެހެއްޓުމަށް ކަމަށާއި ރާއްޖެއިން އަބަދުވެސް އަޑު އުފުލާނީ މޫސުމީ ބަދަލުތަކުން ތިމާވެއްޓަށް ލިބޭ ގެއްލުންތައް ކުޑަކުރުމަށް ކަމަށް ވިދާޅުވި އެވެ. އަދި އެއްވެސް ތަފާތު ކުރުމެއް ނެތި އިންސާނީ ހައްގުތައް ހިމާޔަތްކޮށް ރައްކާތެރިކުރުމަށް ވަކާލާތު ކުރާނެ ކަމަށް ރައީސް ވިދާޅުވި އެވެ.
މީގެ އިތުރުން ރާއްޖެއިން ޑިމޮކްރަސީގެ ހަމަތަކާއި ސުލްހައަށް އިސްކަން ދިނުމުގެ ސިޔާސަތު ދަމަހައްޓާނެކަމަށް ވިދާޅުވި އެވެ. މުޅި ދުނިޔެ މިއަދު މި ސިޔާސަތުތައް ބަލައިގެންފައިވާކަމަށް ރައީސް ވިދާޅުވި އެވެ. އެގޮތުން އެމަނިކުފާނު ފާހަގަކުރެއްވީ އދ. ގެ އާންމު މަޖިލީހުގެ ރިޔާސަތަށް ފޮރިން މިނިސްޓަރު އަބްދުﷲ ޝާހިދު ބޮޑު އަގުލަބިއްޔަތަކުން އިންތިހާބުވެ ވަޑައިގަތް ގަތުމެވެ. ރައީސް ވިދާޅުވީ އެކާމިޔާބީ ލިބުނީ ޝާހިދުގެ ހާރިޖީ ސިޔާސަތުތަކުގެ ސަބަބުން ކަމަށެވެ.
ރައީސް ސޯލިހު ވިދާޅުވި ގޮތުގައި އެމަނިކުފާނު ވެރިކަމަށް ވަޑައިގަތްއިރު ރާއްޖެ އޮތީ ބައިނަލްއަގުވާމީ ދުނިޔެއިން ވަރަށް ބޮޑަށް އެކަހެރިވެފަ އެވެ. މިކަމުގެ ސަބަބުން ގައުމުގެ މިނިވަންކަމަށް އަސަރު ކޮށްފާނެ ކަމުގެ ބިރު އޮތްކަމަށް ރައީސް ވިދާޅުވި އެވެ. އެގޮތުގައި އޮންނަތާ ފަސް އަހަރު ފަހުން މިއަދު އަނެއްކާވެސް ބައިނަލްއަގުވާމީ މުޖުތަމައުއިން ރާއްޖެ ބަލައިގެންފައިވާކަމަށް ވިދާޅުވި އެވެ.
މިއަދު ހުޅުވިގެންދިޔަ ފޮރިން މިނިސްޓްރީގެ އިމާރާތުގެ މަރާމާތުގެ ކަންކަން ކޮވިޑް-19 ގެ ބަލިމަޑުކަމުގެ ތެރޭގައިވެސް ހުއްޓުނަ ނުދީ ކުރިއަށް ގެންދަވައި މަސައްކަތް ނިންމައިދެއްވީތީ ރައީސް ވަނީ ޗައިނާ ސަފީރަށާއި އެގައުމުގެ ސަރުކާރަށް ޝުކުރު އަދާކުރައްވައިފަ އެވެ.
