އެކްޓަރު ރަންވީރު ސިންގް އަކީ "ވަރަށް ލޯބި މީހެއް" ކަމަށް ކުރީގެ މަޝްހޫރު އެކްޓަރު ދަރްމޭންދުރަ ބުނެފި އެވެ.
70 ގެ އަދި 80 ގެ އަހަރުތަކުގައި ބޮލީވުޑްގައި މަޝްހޫރުކަން ހޯދި މޮޅު އެކްޓަރު މިހާރުވެސް އަންނަނީ ބައެއް ފިލްމުތަކުގައި ސަޕޯޓިން ރޯލުތައް އަދާކުރަމުންނެވެ. އެގޮތުން ކަރަން ޖޯހަރު ޑައިރެކްޓުކުރަން ތައްޔާރުވަމުންދާ "ރޮކީ އޯރް ރާނީ ކީ ޕްރޭމް ކަހާނީ" ގައި މުހިންމު ރޯލަކުން ދަރްމޭންދުރަ ފެންނާނެ އެވެ.
އެފިލްމުގައި ލީޑް ރޯލު ކުޅޭނީ ރަންވީރް ސިންގްގެ އިތުރުން އާލިއާ ބަޓް އެވެ. ދެމީހުންނާއި ގުޅޭގޮތުން ވާހަކަ ދައްކަމުން ދަރްމޭންދުރަ ބުނީ ރަންވީރުގެ ކޮންމެ ފިލްމެއްގައިވެސް އޭނާ ދައްކަނީ ވަރަށް އަސްލު އެކްޓިންއެއް ކަމަށެވެ. އަދި އޭނާއަކީ ވަރަށް ލޯބި މީހެއްކަމަށް ބުންޏެވެ/
"ކޮންމެ ހަފްލާއަކުން ފެނުނަސް އައިސް ކައިރީގަ އިށީންނާނެ." ރަންވީރާއި ގުޅޭގޮތުން ދަރްމޭންދުރަ ބުންޏެވެ.
މީގެ އިތުރުން އާލިއާގެ މަސައްކަތްތައްވެސް ވަރަށް މޮޅުކަމަށް ބުންޏެވެ.
ދަރްމޭންދުރަ، އާލިއާ އަދި ރަންވީރުގެ އިތުރުން "ރޮކީ އޯރް ރާނީ" ގެ މުހިންމު ރޯލުތަކުން ފެންނާނީ ޖަޔާ ބައްޗަން އަދި ޝަބާނާ އާޒްމީ އެވެ. މިއީ "އޭ ދިލް ހެ މުޝްކިލް" އަށްފަހު ކަރަން ޑައިރެކްޓު ކުރާ ފުރަތަމަ ފިލްމެކެވެ.
ކަރަންގެ އެހެން ފިލްމުތަކެކޭވެސް އެއްގޮތަށް މިފިލްމަކީވެސް ލޯބީގެ ފިލްމެކެވެ. މިހާރު ވަނީ ފިލްމު ޝޫޓު ކުރާނެ ތަންތަން ބެލުމުގެ މަސައްކަތް ފަށައިފަ އެވެ. މި އަހަރު ފަހުކޮޅު ޝޫޓިން ފަށާނެކަމަށް ބެލެވެ އެވެ.
