ހިޔާ ފްލެޓު ލިބުނު މީހުންގެ އެއްބަސްވުންތަކުގައި ސޮއިކުރުމުގެ މަސައްކަތުގައި އުޅުނު އެޗްޑީސީގެ މުވައްޒަފަކު ކޮވިޑް-19 އަށް ޕޮޒިޓިވްވެ، އެއްބަސްވުންތަކުގައި ސޮއިކުރުން މެދުކަނޑާލައިފި އެވެ.
އެޗްޑީސީން ބުނީ ސޮއިކުރުން މެދުކަނޑައިލުމާއިއެކު މިއަދު ހެނދުނު 10 ޖެހީއްސުރެއް ތާވަލުކޮށްފައިވާ ސޮއިކުރުންތައް ފަސްކޮށްފައިވާ ކަމަށެވެ. އަދި ދެން އެކަން ކުރިއަށް ގެންދާނެ ތާރީހެއް ކަނޑައަޅާނީ އެޗްޕީއޭއާއިއެކު މަޝްވަރާ ކުރުމަށްފަހު ކަމަށްވެސް އެ ކޯޕަރޭޝަނުން ބުންޏެވެ.
ހިޔާ މަޝްރޫއުގެ ދަށުން ހުޅުމާލެ ދެވަނަ ފިޔަވަހީގައި އަޅާފައިވާ 25 ބުރީގެ 16 ޓަވަރުން ފްލެޓު ލިބުނު 6،720 މީހުންނާއިއެކު އެއްބަސްވުންތަކުގައި ސޮއިކުރުން އެޗްޑީސީން ފެށީ މިދިޔަ ޖުލައި މަހުގެ 14 ދުވަހު އެވެ. އޭގެ ފަހުން ކޮންމެ ދުވަހަކުވެސް ސޮއިކުރަން ހަމަޖެހިފައިވާ މީހުންގެ ނަންތައް އެޗްޑީސީން އަންނަނީ އެއޮފީހުގެ ވެބްސައިޓުގައި އާންމު ކުރަމުންނެވެ.
ހިޔާ ފްލެޓުތަކަށް ކަރަންޓު ދިނުމުގެ މަސައްކަތް މިދިޔަ މަހުގެ ތެރޭގައި ވަނީ ނިންމާލައިފަ އެވެ. އެ ފްލެޓުތައް އެ ލިބުނު ފަރާތްތަކާއި ހަވާލުކުރަނީ ފިނިޝިން މަސައްކަތް ނުނިންމަ އެވެ. އެހެންކަމުން ސަރުކާރުން ބުނެފައިވަނީ މިމަހުގެ ފަހުކޮޅު ފްލެޓުތަކަށް މީހުންނަށް އެތަނަށް ވަދެވޭވަރު ވާނެ ކަމަށެވެ.
