ކާމިޔާބު މީހަކީ އޭނާގެ މަސައްކަތުން ހަޔާތް އާރާސްތު ކުރާ މީހާ ކަމަށް މިއަދުގެ ހުކުރު ހުތުބާގައި ބުނެފިއެވެ.
މިއަދުގެ ހުތުބާ ހާއްސަކޮށްފައިވަނީ ރިޒްގް ހޯދުމަށް މަސައްކަތް ކުރުން މި މައުޟޫއަށެވެ. މީގެ އިތުރުން ރިޒްގު ތަނަވަސްކޮށްދެއްވައި، ރިޒްގުގައި ބަރަކާތް ލައްވާ ކަންތައްތަކުގެ ތެރޭގައި ރަޙިމުގެ ގުޅުން ދެމެހެއްޓުމާއި، ގާތް ތިމާގެ މީހުންނަށް ހެޔޮކޮށް ހިތުމުގެ މުހިންމުކަމުގެ މައްޗަށް ހުތުބާގައި އަލިއަޅުއްވާލައްވާފައިވެއެވެ. މިއީ އިސްލާމީ މަތިވެރި އަހްލާގުގެ ތެރޭގައި ހިމެނޭ ކަމެއް ކަމުގައި ހުތުބާގައި ބުނެފައިވެއެވެ.
މީގެ އިތުރުން ރިޒްގުގައި ބަކަރާތްލައްވާ ކަންތައްތަކުގެ ތެރޭގައި ފަގީރުންނަށާއި ބޭނުންޖެހިފައިވާ މީހުންނަށް އެހީތެރިވުން ހިމެނެއެވެ. އަދި ދަތި ހާލުގައި ޖެހިފައިވާ މީހަކަށް އެމީހަކުގެ ބޭނުން ފުއްދަވައި ދީފި މީހަކަށް ﷲ ތައާލާ ލުއި ފަސޭހަކަން ދެއްވާނެކަން ހުތުބާގައި ބަޔާންކޮށްފައިވެއެވެ. އެކަކު އަނެކަކަށް އެހީތެރިވުމުގެ މުހިންމުކަން ހުތުބާގައި ވަރަށް ތަފްސީލްކޮށް ބަޔާންކޮށްފައިވެއެވެ.
