އިލެކްޝަންސް ކޮމިޝަނުގެ މެމްބަރުކަމަށް އައްޔަން ކުރަން 5 ބޭފުޅެއްގެ ނަން ރައީސް، މަޖިލީހަށް ފޮނުއްވައިފިއެވެ.
އެގޮތުން އިލެކްޝަންނަށް އައްޔަން ކުރަން ފޮނުއްވި ލިސްޓްގެ އެންމެ ކުރީގައި އޮތީ މީގެ ކުރިންވެސް އެކޮމިޝަނުގައި މަސައްކަތް ކުރައްވާފައިވާ މުހައްމަދު އާސިފުއެވެ. ދެވަނަ އަށް ލިސްޓްގައި އޮތީ މިހާރުވެސް އިލެކްޝަންސްގެ ޑިރެކްޓަރެއްގެ މަގާމުގައި މަސައްކަތް ކުރަމުންދާ ޝަހުލާ އިސްމާއިލްގެ ނަމެވެ.
މީގެ އިތުރުން ހިމެނެނީ އަޒްލީމާ އަހުމަދު، އަހުމަދު މަންސޫރުގެ އިތުރުން އަލްއުސްތާޒާ މަރިޔަމް ހަނީފާ ހާލިދުގެ ނަމެވެ.
އިލެކްޝަންސް ކޮމިޝަނުގެ މެމްބަރެއްގެ މަގާމު ހުސްވީ އެކޮމިޝަނުގެ ރައީސް ކަމުގައި ހުންނެވި އަހުމަދު ޝަރީފު މިދިޔަ މަހުގެ 15 ގައި އިސްތިއުފާ ދެއްވުމުންނެވެ. ޝަރީފް އެމަގާމަށް އައްޔަން ކޮށްފައިވަނީ ކުރީގެ ރައީސް ޔާމީންގެ ވެރިކަމުގައި 6 މާރޗް 2018ގައެވެ.
އޭގެ ފަހުން ޝަރީފު ރައީސް ކަމުގައި ހުންނަވާ 2018 ވަނަ އަހަރުގެ ރިއާސީ އިންތިހާބާއި، ރައްޔިތުންގެ މަޖިލީހުގެ އިންތިހާބުގެ އިތުރުން ލޯކަލް ކައުންސިލްތަކުގެ އިންތިހާބުވެސް ވަނީ ބާއްވާފައެވެ.
