ރާއްޖޭގެ ސިޔާސީ މަސްރަހުން މިހާރު ފެންނަނީ ގައިމުވެސް ފެންނާނެ ކަމަށް އަޅުގަނޑު ގަބޫލުކުރާ ކަންކަމެއް ނޫނެވެ. ހާއްސަގޮތެއްގައި އެމްޑީޕީގެ ވެރިކަމެއް އޮވެ ހުރިހާ ބާރެއް އޮވެމެ އެ ޕާޓީގެ ތެރޭގައި އޮތް ހަމަނުޖެހުންތަކެވެ. ރައީސް ނަޝީދަށް ދިން ބޮމުގެ ހަމާލާ އާއި ގުޅިގެން ކުރެވުނު ތުހުމަތުތަކާއި ދެކެވުނު އެކި ވާހަކަތަކެވެ. އިތުރު ފަރުވާއަށް ރާއްޖެއިން ބޭރަށް ވަޑައިގެން ހުންނެވި ނަޝީދު ރާއްޖެ ވަޑައިގެންނަވަން ޖެހިލުންވާ ކަމަށް ތަކުރާރުކޮށް ވިދާޅުވަމުން ދިއުމެވެ.
ކީއްވެ ހެއްޔެވެ. ވެރިކަމުގައި އޮތީ އެމްޑީޕީއެވެ. މަޖިލީހުގެ ސުޕަރ މެޖޯރިޓީ އޮތީ އެމްޑީޕީގެ އަތުގައެވެ. އެކަމަކުވެސް ނަޝީދުގެ އިތުބާރު ރައީސް ސާލިހަށް ނެތީ ކީއްވެ ހެއްޔެވެ. މިވަގުތު ރާއްޖެއަށް އައުމަށް އާއިލާއާއި، ހެޔޮއެދޭ އެތައް ބަޔަކުވެސް އަދި އެމަނިކުފާނުވެސް ޖެހިލުންވާކަމަށް ނަޝީދު ވަނީ ވިދާޅުވެފައެވެ.
ރައްޔިތުންގެ މަޖިލީހުގެ ނައިބު ރައީސް އަށް އެޑްރެސްކޮށް ރައީސް ނަޝީދު ފޮނުއްވި ސިޓީއެއްގައި ވިދާޅުވެފައިވަނީ 6 މެއި 2021 ގައި ނަޝީދު އަމާޒުކޮށް ދިން ހަމަލާ ރާވައި ހިންގި ފަރާތްތަކުގެ ތަހުގީގު އަދި ނުނިމި ކުރިއަށްދާކަމަށް ދިވެހި ފުލުހުންގެ މައުލޫމާތުދީފައިވާއިރު އެ ތަހުގީގު ނިމި، އެކަން ރާވައި ހިންގި ފަރާތްތައް އިންސާފުގެ ކުރިމައްޗަށް ގެނެވި، ހައްޔަރުގައި ބޭތިއްބުމުގެ ކުރީގައި ރާއްޖެ އައުމަކީ ޖެހިލުންވާ ކަމެއް ކަމަށެވެ.
ދާދި ފަހުން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް އިބްރާހިމް މުހައްމަދު ސާލިހު ވިދާޅުވެފައިވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ފުރިހަމަ ރައްކާތެރިކަން ލިބޭނެ ކަމަށާއި ވީހާވެސް އަވަހަށް އެމަނިކުފާނު މާލެ ވަޑައިގަތުމަށް އެދޭ ކަމަށެވެ. ނޫސްވެރިއަކު ކުރި ސުވާލަކަށް ޖަވާބުދެއްވަމުން ރައީސް ސާލިހު ވިދާޅުވީ، ނަޝީދަށް ފުރިހަމަ ރައްކާތެރިކަން ސަރުކާރުން ދޭނެ ކަމުގެ ޔަގީންކަން ދެއްވާ ކަމަށެވެ. އަދި އެއްވެސް އިރެއްގައި ނަޝީދުގެ ސެކިއުރިޓީއަށް ސަރުކާރުން ހުރަސް ނާޅާ ކަމަށް ރައީސް ވިދާޅުވިއެވެ.
ރައީސް ސާލިހު މިފަދައިން ވިދާޅުވެފައިވާއިރުވެސް ރައީސް ނަޝީދަށް އިތުބާރު ނުކުރެއްވެނީ ކީއްވެ ކަމެއް ސާފެއް ނުވެއެވެ. ނަޝީދު ވަނީ މީގެ ކުރިން އިދިކޮޅު ޕީޕީއެމްއާއެކު މަސައްކަތް ކުރަން ބޭނުންވާ ކަމަށްވެސް ހާމަކުރައްވާފައެވެ. ރައީސް ނަޝީދާ ރައީސް ސާލިހުގެ ދެބަސްވުންތައް އުޅޭކަން ޔަގީންވާއިރު މިކަމުގައި ދެން ވާނެ ގޮތެއް ބަލަން ނުވަތަ ވާނެ ގޮތެއް ބެލުމުގެ ޝައުގުވެރިކަން އަޅުގަނޑުވެސް އެބަހުއްޓެވެ. ކުރިއަށް އޮތީ ރިޔާސީ އިންތިހާބެވެ. އިންތިހާބުގައި ވާދަކުރެއްވުމުގެ ޝައުގުވެރިކަން ރައީސް ސާލިހު ވަނީ ފާޅުކުރައްވާފައެވެ. އެހެންވީމާ ކުރިއަށް އޮތީ ރާއްޖޭގެ ސިޔާސީ ދާއިރާގައި އިންޓްރެސްޓިން ދުވަސްތަކެއްކަން ޔަގީނެވެ.
