ވިނަރެސް ފްލެޓްތަކަކީ ރައީސް ސާލިހަށް އަމިއްލަ ސަރުކާރުން ދީގެން އުޅޭ ކެއްސެއް ކަމަށް މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.
މުހައްމަދު ސައީދު ކުރެއްވި ޓުވީޓެއްގައި ވިދާޅުވީ، 5 އަހަރު ނިމިދަނީ ކަންކަން ޑެލިވަރ ކުރުމުގެ މާހަލައުލެއް ސަރުކާރު ތެރޭގައި ނެތުމުން ކަމަށެވެ. އަދި ބަހަނާ ނުދައްކާ މަޝްރޫއުތައް ނިންމާ ރައްޔިތުންނާ ހަވާލުކުރުމަށް މެމްބަރު ސައީދު ވަނީ ސަރުކާރަށް ގޮވާލައްވާފައެވެ. ސައީދު ވިދާޅުވީ، ކުރިއަށް ގެންދަނީ ހިޔާ މަޝްރޫއު ކަމަށާއި ވިނަރެސް ކިޔާ މަޝްރޫއެއް ނޯންނާނެ ކަމަށެވެ.
އަދި މިއީ ރައީސް ސާލިހުގެ އަމިއްލަ ސަރުކާރުން އެމަނިކުފާނަށް ދީގެން އުޅޭ ކެއްސެއް ކަމަށް ސައީދު ވަނީ ވިދާޅުވެފައެވެ. މުހައްމަދު ސައީދު މިހެން ވިދާޅުވީ، މި ސަރުކާރުގެ ބޯހިޔާވަހިކަމުގެ މަޝްރޫއު ވިނަރެސްގެ ފެލެޓްތަކުގެ މަސައްކަތް ލަސްވެގެން ދަނީ ކުރީ ސަރުކާރުން އަމަލު ކޮށްފައިވާ ގޮތުން ކަމަށް ހައުސިން ޑިވޮލޮޕްމަންޓް ކޯޕަރޭޝަނުން ބުނުމާއި ގުޅިގެންނެވެ.
