މިރޭ ވިއްކާ 1000 ޓިކެޓް ގަތުމަށްޓަކައި ސޯޝަލް ސެންޓަރުގައި ގިނަ ބަޔަކު ކިޔު ހަދައިފިއެވެ.
ޔޫތު މިނިސްޓަރ އަހުމަދު މަހުލޫފު ކުރެއްވި ޓުވީޓެއްގައި ވިދާޅުވީ، މިރޭ ވިއްކަން އިއުލާން ކޮށްފައިވާ 1000 ޓިކެޓު ގަތުމަށް މިހާރު ސޯޝަލް ސެންޓަރުގަ ވަނީ ކިޔު ހަދާފަ ކަމަށާއި މެޗަކަށްފަހު މެޗެއް މިދަނީ ފޯރި ގަދަވަމުން ކަމަށެވެ.
މިނިސްޓަރ މަހުލޫފު ވިދާޅުވީ، ރައީސް އޮފީހުގެ ބޭނުމަށް މާދަމާގެ މެޗަށް 1600 ޓިކެޓް ގެންގޮސްފައިވާ ކަމަށް ބައެއް މީޑިއާތަކުން ފަތުރާފައިވާ ހަބަރަކީ ދޮގެއް ކަމަށެވެ. އަދި ދޮގު މައުލޫމާތުތަކެއް ދައުރުކޮށް މިފަދަ ދަނޑިވަޅެއްގައި ރައްޔިތުންގެ އިހުސާސްތަކާއި ކުޅެން އުޅުމަކީ ވަރަށް ދެރަ ކަމެއް ކަމަށް މަހުލޫފު ވިދާޅުވިއެވެ.
މާދަމާގެ މެޗަށް އިތުރު 1000 ޓިކެތް ވިއްކަން އެފްއޭއެމުން ނިންމީ ޓިކެޓް ގަންނަން ކިޔޫގައި ތިބި ގިނަ ބަޔަކަށް ޓިކެޓް ނުލިބުމުން ނުރުހުން ފާޅުކުރަން ފެށުމުންނެވެ. މި 1000 ޓިކެޓް ވިއްކަން ފަށާނީ މީހަކަށް ޓިކެޓެއްގެ މަގުން މިރޭ 20:00 ގައި ސޯޝަލް ސެންޓަރުގައި ކަމަށް އެފްއޭއެމުން ހާމަކުރެއެވެ.
